Joldaý: Qaraǵandy oblysynda zaýyt eksportqa shyǵarylatyn mys óndirip jatyr

ASTANA. QazAqparat - Qaraǵandy oblysynda katodty mys óndiretin zaýyt joǵary tıimdi tehnologııany paıdalanyp jatyr. Bul týraly QR Investıtsııalar jáne damý birinshi vıtse-mınıstri Roman Sklıar QazAqparattyń joldaǵan resmı saýalyna bergen jaýabynda málimdedi.

«Sary-Arka Copper Processing JShS - Qaraǵandy oblysyndaǵy jyldyq qýattylyǵy shamamen 9,5 myń tonnany quraıtyn iri katodty mys zaýyty. Qurylys quny 14 mlrd teńgeni quraıdy. Sary-Arka Copper Processing JShS mysty úımelik siltisizdendirý, eritindi ekstraktsııasy jáne elektrolız jolymen óndiredi. Osy tehnologııany paıdalana otyryp, kenniń mıneraldy quramyna baılanysty 99,99% joǵary sapaly katodty mysty alýǵa jáne protsestiń joǵary ekonomıkalyq tıimdiligin qamtamasyz etýge bolady», - dedi R. Sklıar.

Vıtse-mınıstr osy tehnologııa boıynsha Qazaqstan Respýblıkasynda birneshe zaýyt jumys istep jatqanyn atap ótti. Ónimniń 100%-y eksporttalatyn bolady. Óndirilgen ónimder sym, shınalar, sym, katankalar jáne kóptegen basqa da buıymdardy óndirýde qoldanylady. Zaýyt osy jyldyń shilde aıynda iske qosyldy.

Eske salaıyq, Qazaqstan Respýblıkasynyń Prezıdenti N.Nazarbaev 2018 jyldyń 5 qazanynda joldaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýynda eksportqa baǵyttalǵan ındýstrıalızatsııanyń ekonomıkalyq saıasattyń ortalyq elementi bolýy tıis ekendigin atap ótti.