Joldaý basymdyqtary: Jetisýda óndiris qyzmetkerlerimen pikir almasty
TALDYQORǴAN. KAZINFORM — Memleket basshysy Qasym-Jomart Toqaevtyń «Jańa tarıhı kezeńdegi Qazaqstannyń ózekti mindetteri» atty Joldaýyn halyqqa túsindirý boıynsha respýblıkalyq úgit-nasıhat tobynyń músheleri Quryltaı depýtaty Naýryz Saılaýbaı men Qazaqstan Halyq keńesiniń múshesi Rýfına Ýsanova Taldyqorǵan qalasyndaǵy «Qaınar AKB» jaýapkershiligi shekteýli seriktestiginiń ujymymen kezdesti. Kásiporynnyń májilis zalynda ótken is-sharaǵa 100 adam qatysty.
Kezdesý barysynda Quryltaı depýtaty Naýryz Saılaýbaı óndiris oryndarynyń jumys oryndaryn qurýdaǵy, halyqty turaqty tabyspen qamtamasyz etýdegi jáne bıýdjet túsimderin arttyrýdaǵy róline toqtaldy. Ol «Qaınar-AKB» ónimderiniń shetel naryǵyna shyǵýy otandyq óndiristiń áleýetin kórsetetinin atap ótti.
— «Qaınar-AKB» — óńirimizdiń maqtanyshy. Ózimizdiń týǵan jerimizde shyǵarylǵan ónimniń shetelde paıdalanylyp júrgeni qýantady. Óndiris kóleminiń artýy jańa jumys oryndarynyń ashylýyna, azamattardyń tabysy men salyq túsimderiniń kóbeıýine yqpal etip otyr. Sondyqtan osyndaı kásiporyndar damýynyń el ekonomıkasyndaǵy mańyzy zor, — dedi depýtat.
QR Halyq Keńesiniń múshesi Rýfına Ýsanova kásiporyn jumysshylaryna qajyrly eńbegi úshin alǵys aıtty.
— Kásiporyndy aralaý barysynda óndiristegi jumystyń qanshalyqty kúrdeli ári jaýapty ekenin kórdim. Munda eńbek etetin 1200 adamnyń 45 paıyzy áıelder eken. Osyndaı aýyr jumysty atqaryp júrgen áıel azamattarǵa erekshe rızashylyǵymdy bildiremin. Barshańyzǵa eńbekterińiz úshin raqmet, — dedi Rýfına Ýsanova.
Kezdesýge qatysýshylar oblystyń kólik-logıstıka áleýetin arttyrý, Taldyqorǵandaǵy qalalyq ınfraqurylymdy damytý máselelerin talqylady. Sol sııaqty áleýmettik ınfraqurylymdy damytý mindetterine toqtalyp, jol, sý, gaz jáne elektrmen jabdyqtaý máselelerin sheshýdiń mańyzyn aıtty. Sondaı-aq basqosýda kásiporyn qyzmetkerleriniń turǵyn úı máselesi de kóterildi. Ujym ókili jumysshylardyń tabysy keıbir turǵyn úı baǵdarlamalarynyń talaptaryna sáıkes kelmeıtinin aıtyp, olarǵa baspana alýdyń qandaı múmkindikteri baryn surady.
Naýryz Saılaýbaı kásiporynǵa «Otbasy bankpen» birlesip, qyzmetkerlerdiń tabysy men eńbek ótilin eskeretin arnaıy ıpotekalyq baǵdarlama ázirleý múmkindigin qarastyrýdy usyndy. Ol mysal retinde Hromtaýdaǵy taý-ken kásipornynyń bankpen birlesip, jumysshylaryna baspana alýǵa qoldaý kórsetken tájirıbesin keltirdi.
Kezdesý sońynda Naýryz Saılaýbaı men Rýfına Ýsanova qatysýshylardyń suraqtaryna jaýap berdi.
