Joldaý aıtyldy, endi onyń sátti júzege asýy qajet – Jasulan Bostandyquly

ALMATY. QazAqparat - Prezıdent Joldaýy «Jańa Qazaqstandy» qurýdaǵy eń úlken betburys boldy. «Qazaqstan stýdentteriniń Alıansy» Almaty qalalyq fılıalynyń jetekshisi Jasulan Bostandyquly osyndaı pikir bildirdi, dep habarlaıdy QazAqparat tilshisi.

Spıkerdiń aıtýynsha, Joldaýda tek ekonomıkalyq-saıası ózgeristerden bólek, elimizdiń ákimshilik-aýmaqtyq qurylymyna da birshama ózgerister engizildi.

«Uly tulǵalarymyz ulyqtalyp, tarıhı jáne rýhanı sana túgendeldi. Demokratııa uǵymy endi ashylǵandaı boldy. Prezıdenttik ókilettilik qysqaryp, Parlamentke basymdyq beriledi. Bul damyǵan memleketterdiń tájirıbesi. Depýtattar sany qysqaryp, sandyq emes, sapalyq qurylymǵa basa mán berildi. Saılaý júıesine de birshama ózgerister engizilip, partııalyq uıymdardy tirkeý úderisi qysqardy», - dedi Jasulan Bostandyquly.

Sondaı-aq ol «quryltaı» uǵymy qaıta jandanatynyna pikirin jetkizdi.

«Elimizde Ulttyq keńes ornyna Ulttyq quryltaı qurylatyn boldy. Jergilikti ózin-ózi basqarý júıesi qaıta qalyptasyp, jergilikti máslıhattardyń róli kúsheıedi. Joldaý aıtyldy, endi onyń sátti júzege asýy qajet»,- dedi spıker.