Joldaý: «Araltuz» AQ jumysshylarynyń jalaqysy kóbeıedi
QYZYLORDA. QazAqparat - Elbasy Joldaýynda eń tómengi jalaqy mólsherin 1 jarym esege kóbeıtýdi tapsyrdy ári bul bastamany iri kompanııalar qoldaıtynyna senim artqan edi. Qyzylorda oblysyndaǵy «Araltuz» aktsıonerlik qoǵamy alǵashqylarynyń biri bolyp Prezıdenttiń bastamasyna qoldaý bildirdi, dep habarlaıdy Habar24.kz.
Jańa jyldan bastap «Aq altyn» óndirýshilerdiń aılyq tabysy 20 protsentke ósedi. Araldaǵy tuz zaýytynyń 90 jyldyq tarıhy bar. Sońǵy jyldary ındýstrııalandyrýdyń ıgiligin kórgen óndiris eki birdeı ıspan tsehyn iske qosty. Óndiris 300 paıyzǵa deıin artyp, 600 jańa jumys orny ashyldy. Esesine eńbekaqy da jyl saıyn kóbeıýde.
«Eńbekaqyny kóbeıtse, árıne, árbir jumyskerdiń áleýmettik jaǵdaıy jaqsarady. Múnda 1 myń 200 adam jumys isteıdi. Zaýyt 25 myń tonna as tuzyn shyǵaratyn bolsa, onyń 14 myń tonnasy tehnıkalyq saladaǵy ónimder, tehnıkalyq tuzdar. Onyń ishinde mal azyǵyna, mal sharýashylyǵyna brıkettelgen tuz shyǵaryp, oǵan da suranys artyp otyr. Búginde «Araltuzdyń» ónimi Reseı naryǵynyń 15 paıyzyn eńsergen. Ótken jyldan bastap Ázerbaıjan men Grýzııaǵa ótkizip keledi. Endigi meje - Qytaıdy moıyndatý», - deıdi tuz baıytý tsehynyń basshysy Berjan Rysmambetov.
«Búgingi kúnde «Araltuz» AQ 70 paıyzyn óziniń ónimin shetelderge eksporttaıdy. Aral aýdany men oblysymyzdyń damýyna úlesin qosyp, halyqtyń áleýmettik jaǵdaıyn jaqsartýǵa kóńil bólinedi. Kompanııa jańa jyldan bastap myńǵa jýyq qyzmetkerlerdiń eńbekaqysyn 20 paıyzdan astam ulǵaıtýdy josparlap otyrmyz»,-deıdi«Araltuz» AQ prezıdenti Aıdynbek Taýasarov.
