Joldaý: Aqtóbede 500-den astam mekeme jumysshylarynyń eńbekaqysyn kóterdi
Aqtóbe oblysynyń ákimdigi, kásipodaq pen jumys berýshiler jyl basynda úshjaqty memorandýmǵa qol qoıdy. Kelisimge sáıkes jumys berýshiler jalaqyny ınflıatsııa deńgeıine saı ósirýi tıis.
«Aqtóbedegi iri kásiporyndar men shaǵyn sharýashylyqtar oblys ákimdigi, kásipodaqpen birge 4 700-den astam memorandýmǵa qol qoıdy. Kelisimge sáıkes jumys berýshiler jyl ishinde eńbekaqyny ınflıatsııa deńgeıine saı kóterýi tıis. Biz qala, aýdan ákimderiniń esebin alyp, jalaqynyń 7-20 paıyzǵa kóterilgenin kórip otyrmyz. Aqtóbe oblysy boıynsha barlyǵy 523 mekeme jalaqyny kóterdi. Іri kásiporyndar qatarynda «SNPS-Aqtóbemunaıgaz» AQ, «SNPS-Aqtóbe kólik kompanııasy» JShS, «Kóktas-Aqtóbe» AQ, «Vostok - Neft» JShS, «Uly Qabyrǵa» sekildi munaı, taý-ken kásiporyndary men aýdandardaǵy shaǵyn sharýashylyqtar bar. Bul jumys 2019 jyly jalǵasady», - dedi Aqtóbe oblystyq eńbek ınspektsııasy basqarmasynyń bólim basshysy Nurlan Erekeev.
Kompanııalar ákimshilik qyzmetkerlerinen góri qaraıym jumysshylaryna jalaqy kóterýdi basty mindet sanaıdy. Máselen, Aqtóbeni aýyz sýymen qamtamasyz etip otyrǵan «Aqbulaq» AQ-y sońǵy jyldary jyl saıyn eńbekaqy kóterýdi óz mindetine aldy.
«Aqtóbede kommýnaldyq mekemeler de jumysshylarynyń jalaqysyn jyl saıyn kóterip otyr. Jylý, ystyq sý taratý kompanııasy 7-20 paıyzǵa, aýyz sýmen qamtamasyz etetin «Aqbulaq» AQ 10-15 paıyzǵa arttyrdy. Bul jerde basshylardyń jalaqysy 7-10 paıyzǵa, al qarapaıym eńbek adamnyń jalaqysy 15-20 paıyz ósip tur. Árdaıym jumysshylarǵa basymdyq beriledi», - dedi Nurlan Erekeev.
