Joldaý ákelgen ózgerister turalaı bastaǵan saıası júıemizge jan bitiredi - Qanat Áýesbaı
Joldaý eń aldymen qazaq memlekettiliginiń saıası júıesiniń jańa, ári sara jolyn sıpattady.
«Reformalardyń jańa baǵdarlamasy naqtylandy, bıliktiń tarmaqtary júıelendi, halyqtyń azamattyq qatysý belsendiliginiń sıpaty belgilendi. Sol arqyly Qazaqstandaǵy jańa saıası mádenıettiń jarqyn úlgisi aıshyqtaldy dep bilemin. Saıası modernızatsııanyń elimizdi ushpaqqa shyǵararyn aıtýdaı aıtyp kelemiz. Endi sonyń kezi keldi. Ásire prezıdenttik bılikten parlamentiniń pármeni artqan prezıdenttik bılikke qaraı oıysqanymyz jańalyqtyń tóresi desem, shyndyqtan qaǵys ketpeımiz. Prezıdenttik bılik shektelip, Parlamentimizdiń qos palatasynyń jumysy kúsheıedi. Konstıtýtsııalyq sot, ulttyq quryltaı sııaqty bılik ınstıtýttary turalaı bastaǵan saıası júıemizge jan bitireri sózsiz», - deıdi halyqaralyq «Qazaq tili» qoǵamy astana fılıalynyń tóraǵasy.
Onyń aıtýynsha, elektorat qaýymyn qýantqan jańalyqtyń endigisi - proportsıonaldy-majorıtarlyq aralas júıeniń engizilýi. Proportsıonaldy júıede tek partııaǵa daýys berip keldi.
Partııa tıisinshe óziniń yńǵaıyna kónetin óz ókilin ózi tańdap keldi.
Majorıtarlyq qaǵıdat engizilgen tusta halyq amanatyn arqalaıtyn tulǵany qalyń buqara ózi tańdaý quqyna ıe bolady.
«Munyń saıası turǵydan tıimdiligi zor. Májilispen qatar, sol arqyly máslıhattyń da yqpalyn kúsheıtetinimiz - oń ózgeris. Buryndary máslıhat tek ákimderdiń qolbalasyna aınalyp, ózi-óz bolyp, derbes sheshim qabyldaı almaıtyn bosbelbeý bolǵanyn nesin jasyraıyq. Endi Parlament depýtattarynyń 70% - proportsıonaldy, 30% - majorıtarly júıe arqyly saılanǵandyqtan, depýtattyq korpýsymyz halyq qalaýlysy degen atqa meılinshe saı bolary shúbásiz», - dep túıindedi Qanat Áýesbaı.
