Joldaý — 2025: medıtsınalyq kómek sapasyn basqarýdyń keshendi jospary ázirlenedi
ASTANA. KAZINFORM — Medıtsınalyq qyzmettiń sapasy men kólemin jáne ashyqtyǵyn qamtamasyz etý maqsatynda jańa jospar daıyndalady. Bul týraly Densaýlyq saqtaý mınıstri Aqmaral Álnazarova málim etti.
— Prezıdenttiń medıtsınalyq qyzmet sapasy men kólemine monıtorıng júrgizýdiń jańa júıesin qurý jónindegi tapsyrmasyn iske asyrý maqsatynda medıtsınalyq kómektiń sapasyn basqarý júıesin jetildirýdiń keshendi josparyn ázirleımiz. Medıtsınalyq kómekke aqy tóleýdiń biryńǵaı júıesine jasandy ıntellekt, medıtsınalyq uıymdardyń lıtsenzııadan keıingi jáne akkredıtteýden keıingi monıtorıngi engiziledi. Sonymen qatar zańnamalyq deńgeıde medıtsınalyq qyzmetke lıtsenzııa merzimin engizý máselesi pysyqtalady, — dedi Aqmaral Álnazarova Úkimet otyrysynda.
Mınıstrdiń málimdeýinshe, atalǵan is-sharalar medıtsınalyq qyzmettiń ashyqtyǵy men shynaıylyǵyn qamtamasyz etýge múmkindik beredi.
— Memleket basshysynyń Joldaýyn iske asyrý maqsatynda dáriger mártebesi men áleýmettik jaǵdaıyn arttyrý baǵytynda mınıstrlik oblys ákimderine «Otbasy bankpen» birlesip, 2026 jyly ásirese kadr tapshylyǵy óte joǵary óńirlerde dárigerlerdi turǵyn úımen qamtamasyz etý usynady. Sonymen qatar, «Qazaqtelekommen» jáne jergilikti atqarýshy organdarymen birlesip, medıtsınalyq qyzmetkerlerdiń qaýipsizdigin qamatmasyz etý maqsatynda, 2100 jedel járdem brıgadalary jáne 644 statsıonardyń qabyldaý bólmeleri vıdeobaqylaýmen qamtamsyz etiledi. Osylaısha Memleket basshysynyń tapsyrmalaryn ýaqtyly jáne sapaly oryndaý úshin jan-jaqty sharalar qabyldanady, — dep túsindirdi vedomstvo basshysy.
Úkimet basshysy Joldaýda júktelgen tapsyrmalardy oryndaý maqsatynda quzyrly organdarǵa 10 naqty tapsyrma júktedi.