Joldaý-2024: 1,3 GVt jańa elektr qýat kózi paıdalanýǵa berildi
ASTANA. KAZINFORM — Prezıdenttiń tapsyrmasy boıynsha aldaǵy bes jylda 14 GVt jańa qýat kózi iske qosylady, dep habarlaıdy Úkimettiń baspasóz qyzmeti.
Prezıdent Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýyn jáne ózge de tapsyrmalaryn júzege asyrý sheńberinde Úkimet otyn-energetıka keshenin júıeli túrde jańǵyrtý boıynsha jumystar júrgizip jatyr.
Energetıka mınıstri Erlan Aqkenjenov atap ótkendeı, júrgizilip jatqan jumystyń negizgi maqsaty — eldiń ekonomıkalyq ósýi men árbir azamattyń ál-aýqatyn arttyrý úshin berik irgetas bolatyn senimdi, ózin-ózi qamtamasyz etetin jáne zamanaýı energetıkalyq júıe qurý.
— Elektr energetıkasy men jylýmen jabdyqtaýdaǵy basty mindet — qýat kózderin arttyrý jáne senimdi ınfraqurylym qurý úshin júıeli túrde jańǵyrtý jumystaryn júrgizý, — dedi Erlan Aqkenjenov.
Prezıdenttiń tapsyrmasy boıynsha aldaǵy bes jylda 14 GVt jańa qýat kózi iske qosylady. Mınıstrdiń aıtýynsha, sońǵy eki jylda onyń 1,3 GVt-y endigisi paıdalanýǵa berilgen.
— Bıyl taǵy 622 MVt iske qosylady, al 2026 jylǵa shamamen 2 700 MVt josparlanǵan. Osy maqsatta jańa nysandardyń qurylysy qarqyndy júrgizilýde. Túrkistan oblysynda qýaty 1000 MVt bolatyn elektr stansasyn salý jobasy júzege asyrylýda. Al Qyzylordada qýattylyǵy 240 MVt bolatyn jańa JEO salý jumystary júrgizilýde, — dedi Erlan Aqkenjenov.
Osyǵan deıin Premer-mınıstrdiń tapsyrmasy boıynsha úkimettik jumys toptary óńirlerge attanǵanyn jazǵan edik. Úkimettik jumys toptary óńirlerdiń jylytý maýsymyna daıyndyǵyn tekserýge kiristi.