«Joldas Toqaev jaý shebine birinshi bolyp basyp kirdi» — Reseı Qorǵanys mınıstrligi biregeı qujatty jarııalady
ASTANA. KAZINFORM – Reseıdiń Qorǵanys mınıstrligi Qazaqstan Prezıdenti Qasym-Jomart Toqaevtyń ákesi — gvardııa serjanty Kemel Toqaevqa qatysty marapattaý paraǵyn qupııasyzdandyryp, kópshilikke jarııalady.
Kemel Toqaev 1945 jyly qańtarda Polshada kórsetken erligi men batyrlyǵy úshin II dárejeli Otan soǵysy ordenimen marapattalǵan, dep habarlaıdy Kazinform KeyNews-ke silteme jasap.
7-shi jeke gvardııalyq Lomjınsk aýyr tank shabýyl polkiniń komandıri, gvardııa podpolkovnıgi Afanasıı Povarov qol qoıǵan qujatta bylaı delingen:
«1945 jyly 21 qańtarda Eglıevets eldi mekeniniń soltústik-batys aýmaǵynda (Polshadaǵy Mazovetsk voevodalyǵyna qarasty) nemister túnde bizdiń pozıtsııalarǵa qarsy shabýyl jasady. Avtomatshylar óz tankterin taısalmaı qorǵap, keıin qarsy shabýylǵa shyǵyp, nemisterdi shegindirdi. Joldas Toqaev jaý shebine birinshi bolyp basyp kirip, avtomatymen 5 nemisti atyp óltirdi jáne bir jaraly nemisti tutqynǵa aldy. Tutqyndy óz bólimshesine ákele jatqanda, Toqaevtyń aıaǵyna jarylǵysh oq tıip, jaralandy (bastapqy mashınkamen terilgen «…jáne aıaǵynan aıyryldy» degen sóılem syzylyp tastalǵan). Toqaev jaraly nemisti atyp óltirip, jarasyn tańyp, óz tankterine jetti».
Bul kúni nemis mergeni jarylǵysh oqpen Kemel Toqaevtyń baltyryn jaralaǵan. Jaýynger Oraldyń ar jaǵyna evakýatsııalanyp, dárigerler onyń aıaǵyn kesýdi uıǵarǵan. Alaıda sol kezdegi jas dáriger — keıin álemge áıgili hırýrg atanǵan Gavrııl Ilızarov ony aman alyp qaldy. Osy sátte Ilızarov Kemel Toqaevqa súıek deformatsııalaryn emdeýge arnalǵan bolashaq ónertabysynyń — biregeı qurylǵysynyń alǵashqy nobaılaryn qoldanǵan.
Aıta keteıik, Jeńistiń 80 jyldyǵyna oraı Prezıdent Teleradıokesheni erekshe jobany iske qosty. Kazinform agenttiginiń fotomuraǵatyndaǵy Ekinshi dúnıejúzilik soǵys jyldary kezinde túsirilgen sırek sýretter jańa tehnologııa kómegimen túrli túske boıalyp, qımyldaıdy. Joba elimizdiń temirjol vokzaldary men áýejaılaryndaǵy LED ekrandardan kórsetilip júr.
Al 5 mamyrda Astanadaǵy «Nurly jol» vokzalynda «QTJ» UK» AQ qoldaýymen «JEŃІSTІŃ 80 JYLDYǴY. KAZINFORM FOTOShEJІRESІ» atty fotokórme ashyldy.