Joldardy jóndeýge bólinetin qarjyny arttyrý usynysy jasaldy
ASTANA. QazAqparat - Joldardy jóndeýge bólingen qarjy qajet somadan eki esege kem. Bul týraly búgin Úkimet otyrysynda «QR Investıtsııalar jáne damý mınıstri Áset Isekeshev málim etti.
«Avtojoldardy jóndeýdi jáne kútip ustaýdy tolyq qarjylandyrmaý máselesine nazar aýdarǵym kelip tur. Osylaısha, 2016 jyly respýblıkalyq mańyzy bar avtomobıl joldaryn jóndeý men kútip ustaýǵa 41 mlrd. teńge bólindi, bul qajet somadan 2 eseden astam kórsetkishke kem (104 mlrd. teńge). Avtomobıl joldaryn qamtýǵa bólingen qarajattyń jetispeýshiligi qyzmet merzimin 30 paıyzǵa nemese 15-ten 10 jylǵa deıin qysqartady»,-dedi mınıstr.
Onyń sózine qaraǵanda, qazirgi ýaqytta mınıstrlikpen avtojoldardy jóndeý jáne jaqsy jaǵdaıda ustaýǵa qarjylandyrýdy ulǵaıtý boıynsha usynystar engizildi.
