Joldardy jóndeý baǵasyn 12,5 mlrd teńgege asyryp kórsetý faktisiniń joly kesildi

NUR-SULTAN. QazAqparat - Joldardy jóndeý baǵasyn 12,5 mlrd teńgege asyryp kórsetý faktisiniń joly kesildi. Bul týraly QR Sybaılas jemqorlyqqa qarsy is-qımyl agenttigi Strategııa jáne jedel basqarý departamentiniń basshysy Nurlan Jaqsymbetov aıtty, dep habarlaıdy QazAqparat tilshisi.

«Ózderińizge málim, Agenttik bıýdjet qarajatyn tıimsiz paıdalanýdyń jolyn kesý boıynsha aýqymdy jumystardy aldyn alýdyń keshendi sharalary arqyly da júrgizedi. Bul baǵytta sybaılas jemqorlyq táýekelderin ýaqtyly anyqtaýǵa naqty jáne belsendi túrde qatysatyn azamattyq qoǵam sheshýshi ról atqarady. Byltyr bizdiń bastamamyzben 500-den astam qoǵamdyq baqylaýshy magıstratýraǵa túsýge júrgizgen monıtorıngtiń nátıjesinde memlekettiń 2,7 mlrd teńge qarajaty únemdelip, daıyndyqsyz qatysqan úmitkerler shyǵaryldy», - dedi ol.

Onyń atap ótýinshe, «Satyp alýdyń biryńǵaı terezesi» taldaý júıesi arqyly satyp alý monıtorıngi boıynsha qashyqtan júrgiziletin kúndelikti jumys nátıjesinde jarty jylda 6 mlrd teńge únemdeldi.

«Sybaılas jemqorlyqqa qarsy «Adaldyq alańy» baǵdarlamasynyń aıasynda Jol aktıvteri sapasynyń ulttyq ortalyǵymen birlesip júzege asyrylyp jatqan «Sapaly jol» jobasynyń nátıjesinde joldardy jóndeý baǵasyn 12,5 mlrd teńgege asyryp kórsetý faktisi anyqtalyp, toqtatyldy«, - dedi Nurlan Jaqsymbetov.