Joldardy kútip-ustaýǵa ǵylymı jańalyqtardy engizý qajet
ASTANA. Sáýirdiń 28-i. QazAqparat. 2010 jylǵy 27 sáýirde kólik jáne kommýnıkatsııa mınıstrligi «KazGerStroı» qazaqstan-german holdınginiń bazasynda «Jol jamylǵysyn jasaý men kútip ustaýdaǵy zamanaýı tehnologııalar» taqyrybynda keńeıtilgen ǵylymı-tehnıkalyq semınar-keńes ótkizdi.
Semınar-keńestiń jumysyna jol qurylysynyń barlyq taramdaryn qamtıtyn kólik vedomstvosy men uıymdarynyń basshylary men mamandary qatysty. Aıtalyq, Avtomobıl joldary komıtetiniń oblystyq departamentteri, «Obljollaboratorııa» MM men olardyń óńirlik qurylymdary, «Astana, Almaty qalasy jolaýshy kóligi men avtomobıl joldary basqarmasy» MM, «Gosekspertıza» RMK, jobalyq jáne merdigerlik uıymdar, Qazaqstannyń barlyq óńirlerinen ǵalymdar men tájirıbıeshiler ókilderi qatysty, dep habarlady KKM baspasóz qyzmetinen.
Keńesti ashqan Avtomobıl joldary komıtetiniń tóraǵasy Zamır Saǵynov bul kezdesý jol qurylysyna jańa ınnovatsııalyq tehnologııalardy engizýge arnalyp otyrǵandyǵyn atap ótti. Budan tys, semınar saladaǵy kókeıkesti máselelerdi talqylaýdyń, sheteldik áriptesterdiń tájirıbesin zertteýdiń jáne máselelerdi sheshýdiń eń tıimdi joldaryn anyqtaýdyń jańa bir múmkindigin ashyp otyr.
Keıingi jyldary avtojol salasyna aıryqsha kóńil bóline bastady, qarjylandyrý kólemi jyl saıyn kóbeıip kele jatqandyǵyn ataý lázim. Aǵymdaǵy jyly jalpy qoldanystyǵy avtojoldardyń damýyna 240,3 mlrd. teńge, sonyń ishinde «Jol kartasy» boıynsha 29,2 mlrd. teńge qarastyrylǵan. Jalpy qoldanystaǵy avtojoldarǵa, jergilikti jelini qosa alǵanda, jóndeý jumystarymen 5 000 shaqyrym astam avtojoldardy qamtý josparlanǵan. 2010 jyly jergilikti avtojol jelilerin damytýǵa 37,3 mlrd. teńge qarastyrylyp, sonyń aıasynda 1 410 shaqyrym jóndeý josparlanǵan. Sonymen qatar, jol-qurylys materıaldaryn óndirý jónindegi irgeles salalar da qarqyndy damı bastady. Búgingi kúnge jol qurylysynda paıdalanatyn materıaldardyń 86 paıyzy qazaqstandyq, onyń ishinde tosqaýyl qorshaýlar, jaryq berý baǵandary, lak-boıaý jáne geosıntetıkalyq materıaldar.
Munymen birge, oń faktorlarmen qatar, keleńsiz faktorlar da bar - olar jol jóndeý sapasynyń tómendigi, jobalaý-smetalyq qujattamalardy ázirleýdegi qatelikter, jumys tehnologııasyn buzý, jol kásiporyndarynyń jaraqtaný deńgeıiniń jetkiliksizdigi. Jobalyq sheshimderge ınnovatsııalyq tehnologııalardy engizý, jol júrý qozǵalysynyń qatysýshylarynyń qaýipsizdigin deńgeıin qamtamasyz etý, uzaq merzimdilik pen jol qurylymynyń jóndeý jumystarynyń aralyq merzimin uzartý boıynsha jumystar tolyq kólemde júrgizilip otyrǵan joq. Qazirgi kúni jobalyq sheshimder shablondy túrde jáne sońdy jetistikterdi eskerýsiz bolyp tabylady.
Ótkizilgen semınar atalǵan qordalanǵan máselelerdi joıýdyń eń tıimdi sheshimderin izdestirý alańyna aınaldy. Semınardyń sońynda oǵan qatysýshylar materıaldardyń sapasyn baqylaýdyń eń jańa qurylǵylarymen tanysty, jol salasyn odan ári damytýdyń negizgi baǵyttaryn belgiledi.
