Joldardyń múshkil jaǵdaıyna qatysty azamattar shaǵymy azaımaı tur – Premer-mınstr
ASTANA. KAZINFORM – Jol qurylystary men jóndeý jumystary – Kólik mınıstrliginiń ǵana emes, ákimdikterge de qatysty másele. Premer-mınıstr Oljas Bektenov ákimderge jergilikti joldar sapasy boıynsha azamattar ótinishine jedel jaýap berýdi tapsyrdy.
Bıyl Memleket basshysy Úkimettiń keńeıtilgen otyrysynda jańa avtojol jobalaryn júzege asyrýǵa basa nazar aýdarǵan edi.
– Elimizde negizgi halyqaralyq kólik dálizderi strategııalyq baǵyt retinde qalyptasyp keledi. Endigi kezekte óńiraralyq joldardy damytýǵa kóńil bólý qajet. «Qaraǵandy-Jezqazǵan», «Beıneý-Sekseýil» jáne basqa da jobalar boıynsha bıyl barlyq qajetti jobalyq qujattamany ázirlep, qarjylandyrý men jer ýchaskelerin rezervke qoıý máselelerin sheshý kerek, – dedi O. Bektenov Úkimettiń búgingi otyrysynda.
Sonymen birge, Astana, Arqalyq jáne Yrǵyzdy baılanystyratyn «Ortalyq-Batys» jobasyn jedeldetý qajettigi aıtyldy.
– Joldardyń sapasy men qaýipsizdigine basa nazar aýdarǵym keledi. Byltyr jergilikti joldar men kóshelerdiń múshkil jaǵdaıyna qatysty azamattardan kelip túsken shaǵymdar sany 1,5 esege artyp, 60 myńǵa jýyqtaǵan. Bıyldyń ózinde shamamen 7,5 myń shaǵym tirkeldi. Ákimdikter azamattardyń ótinishterine jedel jaýap berýge tıis. Ýaqytyly túsindirý jumystaryn júrgizip, jol jóndeý barysyna baqylaýdy kúsheıtý qajet, – dedi Úkimet basshysy.
Máselen, turǵyndar Dossor-Aqtaý, Atyraý-Oral joldarynyń jaǵdaıy nashar ekenin aıtyp keledi.
Al týrızm salasynyń ókilderi Jetisý jáne Abaı oblystarynda, onyń ishinde Alakólge aparatyn óńirlik joldardy kútip-ustaý jumystarynyń sapasyna shaǵymdandy.
– Sapaly joldar – jaıly ári qaýipsiz qozǵalys qana emes, ol óńirlerdiń ekonomıkalyq ósýi men ınvestıtsııalyq tartymdylyǵyn arttyrýǵa da múmkindik beredi. Jol qurylystary men jóndeý jumystarynda tehnologııalardy qatań saqtaý, jobalardy ýaqytyly iske asyrý – tek Kólik mınıstrliginiń ǵana emes, ákimdikterge de qatysty másele. Ony birinshi basshylar turaqty baqylaýda ustaýǵa tıis, – dedi Oljas Bektenov.
Sonymen birge, Premer-mınıstr jol boıyndaǵy servısti damytýǵa kóńil bólýdi tapsyrdy. Shekaralyq ótkizý beketteri mańynda da júrgizýshilerge qyzmet kórsetetin servıstik nysandar ashylýy qajet.
– Tranzıttik tasymal kóleminiń artýyna baılanysty aýyr júk kólikterine de sapaly qyzmet qajet. Servıstik segmenttiń bul túrine suranys joǵary, ony otandyq bıznes usyna alady, – dedi Premer-mınıstr.
Aıta keteıik, elimizde aqyly joldar qataryna taǵy 6 ýchaske qosylady. Aqyly jolda aqaý anyqtalsa, tólem ýaqytsha toqtatylady.