Joldardy tıisti deńgeıde ustamaǵan 487 ákimge ákimshilik shara qoldanyldy
ASTANA. KAZINFORM — 2027 jylǵy qańtardan bastap avtomektepterdi ashýdyń ruqsat berý tártibi engiziledi. Bul týraly Úkimet otyrysynda Іshki ister mınıstri Erjan Sádenov aıtty.
— Júrgizýshilerdi daıarlaý sapasyna baqylaý kúsheıtilip jatyr. Avtomektepterdiń ústinen memlekettik baqylaýdy qaıtaryp jatyrmyz. Ózdiginen daıyndyqty, oqýdy bitirý týraly qaǵaz túrindegi kýálikterdi jáne medıtsınalyq anyqtamalardy alyp tastadyq. Bul ótili 1 jyldan aspaıtyn jas júrgizýshilerdiń kinásinen adam ólimine ákep soqqan oqıǵalar sanyn 2025 jyly 40 paıyzǵa, osy jyly 7 paıyzǵa azaıtýǵa múmkindik berdi. Sonymen qatar, 2027 jylǵy qańtardan bastap avtomektepterdi ashýdyń ruqsat berý tártibi engiziledi, — dedi Erjan Sádenov.
Onyń málimetinshe, ishki ister organdary kún saıyn joldarǵa tekserý júrgizedi. Ákimdikter men jol uıymdaryna nusqamalar engiziledi.
— 5 myń laýazymdy tulǵa jazalandy. Onyń ishinde: aýdan jáne aýyl ákimderine — 487 jáne «QazAvtoJol» fılıaldarynyń basshylyǵyna — 345 ákimshilik shara qoldanyldy. Sonymen qatar, joldardy tıisti deńgeıde ustamaǵany úshin 4 qylmystyq is tergelip jatyr. Tekserý barysynda aýdan-aýyl ákimderi jáne basqa da jaýapty tulǵalar jol ınfraqurylymyna qarajattyń durys bólinbeıtinin aıtyp otyr. Eger osydan keıin aýyr saldarǵa jol berilse jaýapkershilik máselesi oblys basshylyǵy deńgeıinde qaralatyn bolady, — dep eskertti ol.
Mınıstr málimetinshe, búginde polıtsııanyń aralasýymen 1 myń shaqyrym qorshaý, 500 baǵdarsham, 11 myń jol belgisi, 259 retteletin jaıaý júrginshiler ótetin jer ornatyldy.
— Biraq, áli de sheshimin tappaǵan másele kóp. Sondyqtan, adam ómirine tikeleı qatysty osy máselege qala, oblys ákimderi men jaýapty organdar erekshe nazar aýdarýy kerek, — dedi Erjan Sádenov.
Aıta keteıik, otyrysta jol qozǵalysy qaýipsizdigin qamtamasyz etý máselesi qaralyp, jylý berý maýsymyna daıyndyq barysy pysyqtalyp jatyr.
