Joldardy qabyldaý komıssııalaryna polıtsııany qaıta qosý usynyldy

ASTANA. KAZINFORM – Búgingi Úkimet otyrysynda joldardy salý jáne jóndeý kezindegi qaýipsizdik máselesi talqylandy.

QR Іshki ister mınıstriniń orynbasary Igor Lepehanyń aıtýynsha, 2016 jyly polıtsııa ókilderi memlekettik jáne jumys komıssııalary quramynan shyǵaryldy jáne osydan keıin jol qozǵalysyn uıymdastyrýda jobalyq qatelikter jıi kete bastaǵan.

– Sonyń saldarynan joldarda keptelis kóbeıip, jol-kólik oqıǵalarynyń sany artty. Oǵan qosa, turǵyn úı keshenderi men saýda-oıyn-saýyq ortalyqtaryn salǵanda qajetti avtoturaq oryndary qarastyrylmaıdy. Biz polıtsııany joldardy qabyldaý komıssııalarynyń quramyna qaıta qosýdy usynamyz. Qazir qurylysshylar bizdiń qabyldaý kezinde qatyspaıtynymyzdy biledi, sondyqtan jobanyń ózindik qunyn tómendetý maqsatynda qaýipsizdik máselelerin elemeıdi, – dedi Igor Lepeha Úkimet basshysyna.

Premer-Mınıstrdiń orynbasary Roman Sklıar qazirgi ýaqytta nysandardy qabyldaýdy tapsyrys berýshi, merdiger, sondaı-aq avtorlyq jáne tehnıkalyq qadaǵalaý ókilderi júrgizetinin aıtty.

Onyń aıtýynsha, Qurylys kodeksine memlekettik sáýlet-qurylys baqylaýy jáne tótenshe jaǵdaılar organdarynyń qatysýyn mindetteıtin norma engizý josparlanyp otyr.

Aıta keteıik, jyl saıyn elimizdiń joldarynda 2 myńnan astam adam jol apatynan qaza taýyp, 20 myńnan astamy jaraqat alady.