Joldardaǵy sý shaıý qaýpi bar 229 ýchaske Kólik mınıstrliginiń baqylaýyna alyndy
ASTANA. KAZINFORM — Qazaqstan Respýblıkasy Kólik vıtse-mınıstri Maqsat Qalıaqparov 2026 jylǵy sý tasqyny kezeńine kólik ınfraqurylymyn daıyndaý máseleleri boıynsha kezekti jedel keńesin ótkizdi. Bul týraly vedomstvonyń baspasóz qyzmeti máloim etti.
Keńes barysynda kóktemgi sý tasqyny kezeńinde respýblıkalyq mańyzy bar avtomobıl joldary men temirjol jelilerinde qaýipsiz ári úzdiksiz qozǵalysty qamtamasyz etý sharalary qarastyryldy.
— Qazirgi ýaqytta respýblıkalyq avtojoldarda jalpy uzyndyǵy 160 shaqyrymdy quraıtyn sý shaıý qaýpi bar 229 ýchaske baqylaýǵa alynǵan. Atalǵan ýchaskelerge 2252 birlik tehnıka bekitilip, kúndelikti monıtorıng júrgizilip otyr, — delingen habarlamada.
Aldyn alý sharalaryn qabyldaý maqsatynda 40 myń m³ být tasy, 16 myń m³ qum, 5 myń m³ qıyrshyq tas jáne 23 myń m³ qum-qıyrshyq tas qospasy, sondaı-aq 280 myń qap daıyndaldy. Sonymen qatar, tasqyn sýdy kedergisiz ótkizý úshin sý ótkizgish qubyrlaryn tazartý jumystary júrgizilip jatyr.
Sý basý qaýpi bar ýchaskelerde 2025 jyly 582 jańa sý ótkizgish qubyr ornatyldy, al 2026 jyly taǵy 467 qubyr ornatý josparlanyp otyr.
Qabyldanyp jatqan sharalardyń nátıjesinde sońǵy tórt jylda respýblıkalyq avtojoldardaǵy sý basý qaýpi bar ýchaskeler sany 396-dan 229-ǵa azaıdy.
— Temirjol jelisinde josparly túrde 290 vagonnan turatyn 45 poıyz jasaqtaldy. Olar qajetti qural-jabdyqtarmen, ınertti materıaldarmen, být tasymen jáne metall kópir qurylymdarymen qamtamasyz etilgen, — dep habarlady vedomstvodan.
Ońtústik, Batys jáne Shyǵys óńirlerinde 2350 kópir, 4426 sý ótkizgish qubyr, 1215 km kıývet jáne 336,8 km taýly aryqtar tolyq tazartyldy. Bul josparlanǵan jumystyń 100 paıyzyn quraıdy. Soltústik óńirde atalǵan nysandardy tazartý jumystary josparǵa sáıkes jalǵasady.
Sý tasqyny kezeńinde jedel áreket etý úshin qajetti qurylys materıaldary da daıyndaldy. Atap aıtqanda, 2,5 myń m³ být tasy, 7,4 myńnan astam temirbeton shpaldar, 10 ınventarlyq metall aralyq qurylymdar jáne 41 ınventarlyq relstik paket ázirlendi.
Keńes qorytyndysy boıynsha vıtse-mınıstr «QazAvtoJol» UK» AQ, Jol aktıvteri sapasynyń ulttyq ortalyǵy RMK, «QTJ» UK» AQ MJB jáne jergilikti atqarýshy organdarǵa sý basý qaýpi bar ýchaskelerde táýlik boıy kezekshilik uıymdastyrýdy, is-qımyldy úılestirý úshin jumys toptaryn qurýdy jáne jaǵdaıǵa turaqty monıtorıng júrgizýdi tapsyrdy.
Kólik ınfraqurylymyn sý tasqyny kezeńine daıyndaý jumystary Kólik mınıstrliginiń erekshe baqylaýynda.
Búgin Ulytaýda 27 eldi meken sý tasqyny qaýpi bar aımaqta ornalasqany habarlandy.
