Joldarda biligine júktemesi 8 tonnadan asatyn kólikterdiń qozǵalysyna ýaqytsha shekteý engizildi
ASTANA. QazAqparat - Respýblıkalyq joldarda jalqy biligine júktemesi 8 tonnadan asatyn avtokólik quraldarynyń qozǵalysyna ýaqytsha shekteý engizildi. Bul týraly QR KKM málimetinde habarlandy.
Bul shekteý bıylǵy jylǵy 23 naýryz ben 1 mamyr aralyǵynda Aqmola, Aqtóbe, Shyǵys Qazaqstan, Batys Qazaqstan, Qaraǵandy (Qaraǵandy aýdany), Qostanaı, Pavlodar jáne Soltústik Qazaqstan oblystarynda qoldanylady. Osyndaı shekteý Almaty, Atyraý, Jambyl, Qaraǵandy (Jezqazǵan aýdany), Qyzylorda jáne Mańǵystaý oblystarynda 1 naýryz ben 1 sáýir aralyǵynda engizildi. «Mundaı shekteýler joldarda jyl saıyn engizilip turatyny málim. Bul tájirıbe Qazaqstannyń aýa raıyna uqsas elderde qoldanylady. Kóktemdegi sý tasqyny kezeńinde jol jamylǵysynyń ylǵaldanýy sebebinen avtomobıl joldary aýyr júkti kólik quralynyń júktemesi aldynda qorǵansyz jáne olardy qosymsha qorǵaý qajet», - dep atap ótti QR KKM Kólikti baqylaý komıtetiniń tóraǵasy Áset Asaýbaev.
