Joldar tez tozbaýy úshin qandaı materıal qoldanylmaq

ASTANA. KAZINFORM – Qazaqstanda avtomobıl joldarynyń sapasyn arttyrý úshin otandyq polımerli bıtýmdy qoldanýǵa basymdyq berilip otyr. Bul týraly «Kaztraffic 2026» halyqaralyq kórmesinde QR Kólik vıtse-mınıstri Maqsat Qalıaqparov málimdedi.

a
Foto: QazAvtoJol

Onyń sózinshe, jol salýǵa qajetti materıaldardy tańdaǵanda klımattyq jaǵdaı men kólik júktemesin eskerý mańyzdy.

– Basym baǵyttarymyzdyń biri – elimizde óndiriletin polımermen túrlendirilgen bıtýmdy qoldaný. Bul materıal asfaltbeton jabynynyń oıylýǵa jáne jaryqshaqtanýǵa tózimdiligin arttyrady, – dedi Maqsat Qalıaqparov.

Búginde elimizde jol qurylysyna arnalǵan materıaldar men jańa tehnologııalardyń biryńǵaı derekqory jumys isteıdi. Onda materıaldar men tehnologııalar, olardyń synaq nátıjeleri jáne qoldanylý aıasy týraly málimetter jınaqtalǵan. Bul mamandarǵa ár jobaǵa laıyq materıal men tehnologııa tańdaýǵa kómektesedi.

Sonymen birge vıtse-mınıstr jańa materıaldardyń qoldanystaǵy joldarda qanshalyqty tıimdi ekenin baǵalaý mańyzdy ekenin atap ótti.

Onyń aıtýynsha, otandyq jáne sheteldik mamandarmen tájirıbe almasý jaqsy nátıje kórsetken tehnologııalardy ózge jol jobalarynda da keńinen qoldanýǵa múmkindik beredi.

Aıta keteıik, buǵan deıin jol salasynda 8 mlrd teńgeniń zańbuzýshylyǵy anyqtalǵanyn jazǵan edik⁠.