Infraqurylymnyń qaı túrine el azamattarynyń kóńili kóbirek tolady
ASTANA. KAZINFORM — Qazaqstanda árbir 10 turǵynnyń shamamen segizi óz qalasy, kenti nemese aýylyndaǵy mektepterdiń qoljetimdi ekenine qanaǵattanǵan. Bul — 2026 jyldyń III toqsanynda áleýmettik ınfraqurylym nysandary arasynda tirkelgen eń joǵary kórsetkish. Balabaqsha, sport keshenderi men mádenıet mekemeleri de halyqtan joǵary baǵa alǵan.
Qazaqstandyq qoǵamdyq damý ınstıtýty júrgizgen zertteý barysynda turǵyndar óz óńirindegi ınfraqurylym men qyzmetterdiń 17 negizgi elementin baǵalaǵan.
Jalpy, 2026 jyldyń III toqsanynda ınfraqurylymnyń túrli elementterine qanaǵattanǵandar úlesi 57,8%-dan 78,2%-ǵa deıin boldy.
Mektepterdiń qoljetimdiligine respondentterdiń 78,2%-y qanaǵattanatynyn aıtqan.
Balabaqshalardyń qoljetimdiligi 73,3%-dy kórsetti. Bul kórsetkish jyl boıy turaqty saqtalǵan.
Sport keshenderi men nysandarynyń qoljetimdiligine qanaǵattaný deńgeıi 71,6%, mádenıet mekemeleri boıynsha 71,1% boldy.
Abattandyrý men aýyz sý
Saýalnamaǵa qatysqandardyń 67,8%-y serýendeý jáne demalys oryndarynyń bolýyna, 67,3%-y kógaldandyrýǵa qanaǵattanǵan.
Kósheler men aýlalardyń tazalyǵy men jınalý sapasyn 63,8% oń baǵalaǵan. Balalardy damytý múmkindikterine qanaǵattaný deńgeıi 66,2%, aýyz sý sapasy boıynsha 64,4%, memlekettik organdar aqparatynyń qoljetimdiligi boıynsha 64,6% boldy.
Jol sapasy
Zertteýde joldardyń sapasyna berilgen baǵanyń óskeni de aıtylǵan. Bul kórsetkish áli de nazar aýdarýdy qajet etetin baǵyttardyń qatarynda.
Bir jyl ishinde joldardyń sapasyna qanaǵattaný deńgeıi I toqsandaǵy 50%-dan III toqsanda 57,8%-ǵa deıin ósken. Bul ınfraqurylym elementteri arasynda eń eleýli ósimderdiń biri boldy.
Zertteý nátıjesinde áleýmettik mańyzy bar ınfraqurylym óńirlik ortanyń basym jaqtarynyń biri bolyp qala beretini anyqtalǵan. Sonymen birge tsıfrlyq jáne kólik ınfraqurylymyn odan ári damytýǵa basymdyq berý qajettigi kórsetilgen.
Zertteý qalaı júrgizildi
«Qazaqstandaǵy qoǵamdyq-saıası jaǵdaıdyń negizgi ındıkatorlary boıynsha toqsan saıynǵy saýalnama» 2026 jyldyń III toqsanynda Qazaqstandyq qoǵamdyq damý ınstıtýty tarapynan jeke suhbat ádisimen júrgizildi.
Zertteýge 18 jastan asqan 2 400 respondent qatysty. Saýalnamaǵa Astana, Almaty jáne Shymkent qalalary, 17 oblys ortalyǵy, sondaı-aq aýyldyq eldi mekender qamtyldy.
Saýalnama 2026 jylǵy 1-16 tamyz aralyǵynda júrgizilgen.
Eske salaıyq, buǵan deıin el halqynyń 68%-y keıingi úsh jylda ómir súrý jaǵdaıynyń jaqsarǵanyn baıqaǵanyn jazǵanbyz.
