Joldan ótetin jaıaý júrginshiniń basty kemshiligi nede
ASTANA. QazAqparat - QR Parlamenti Májilisiniń jalpy otyrysynda depýtat Mansurhan Mahambetov jaıaý júrginshilerdiń joldarda jaraqat alýy máselesin kóterdi. Osy oraıda ol QR Іshki ister mınıstri Qalmuhanbet Qasymovqa depýtattyq saýalyn joldady, dep habarlaıdy QazAqparat.
«Elimizdiń sońǵy eki jyldaǵy statıstıkalyq derekterine qaraǵanda, jol-kólik oqıǵalary burynǵy jyldarmen salystyrǵanda birshama azaıǵan. Ókinishke qaraı, zardap shekkenderdiń sany azaımaı otyr», - dep toqtaldy ol.
Depýtat 2017 jyldyń shilde aıynda jol qozǵalysy týraly zańnamaǵa tolyqtyrýlar men ózgerister engizý týraly zań kúshine engenin eske salyp ótti. Bul zań jol qozǵalysynyń qaýipsizdigin qamtamasyz etýge jáne onyń barlyq qatysýshylarynyń jaýapkershiligin arttyrýǵa baǵyttalǵan. Zańnyń 56-babynda jaıaý júrginshiniń birshama quqyqtary men mindetteri aıqyndaldy. Sonyń ishińde rettelmeıtin jaıaý júrginshi ótkelderinde joldan ótý úshin, ózine qaýipsiz bolatynyna senimdi bolǵannan keıin ǵana joldyń júretin bóligine shyǵýǵa mindetti ekeni kórsetildi.
«Alaıda, qazirgi tańda zańnyń bul talaby tolyqqandy jumys istemeýde. Kóbinese jaıaý júrginshilerdiń óz mindetterin bilmeý saldarynan qaıǵyly jaǵdaıǵa dýshar bolyp jatqanyn kórip júrmiz. Buny túsinýge de bolady. Sebebi jaıaý júrginshi jolaǵyna shyǵarda, bizdiń barlyǵymyz bolmasaq ta, kópshiligimiz «maǵan kólik júrgizýshiler jol berýge tıisti» dep oılaımyz. Al jolda kele jatqan kólik júrgizýshi aldynan birden shyǵa kelgen adamdy kórip, kóligin toqtatýǵa múmkindigi bola bermeıdi. Bul jerde biz kólik júrgizýshini aqtaǵymyz kelip otyrǵan joq, ıaǵnı jaıaý júrginshi óz mindetine saı qozǵalys jasaıtyn bolsa, qanshama adamdy aýyr jaratqattan aman alyp qalýǵa bolatynyn aıtqymyz keledi», - dedi Mansurhan Mahambetov.
Onyń sózine qaraǵanda, júrgizýshi kólik júrgizý kýáligin alý úshin emtıhan tapsyryp jáne ony basqarýǵa jolda júrý erejelerin tolyq bilý kerek bolsa, al jolaýshy men jaıaý júrginshilerdiń kóbisi óz quqyqtary men mindetterin bile bermeıdi. Bul árbir adamnyń óziniń jaýapkershiliginde qalyp qoıyp otyr.
«Sondyqtan memlekettik ýákilettik organ basqa da tıisti organdarmen birlesip, buqaralyq aqparat quraldaryn paıdalanyp, zańnyń normalaryn halyqqa túsindirý men quqyq buzýshylyqtyń aldyn alýǵa baǵyttalǵan profılaktıkalyq jumystaryn jandandyrýy durys dep oılaımyz», - dedi depýtat.
