Joldaǵy kólikterdiń shamdary kúndiz-túni qosylyp turǵanda jol apatyn 20 paıyzǵa tómendetýge bolady - QR ІІM
ASTANA. QazAqparat - Jolda kólikterdiń shamdary kúndiz-túni qosylyp tursa, jol apaty 20 paıyzǵa tómendeıdi. Bul týraly búgin Astanadaǵy baspasóz máslıhatynda QR ІІM Ákimshilik polıtsııa komıtetiniń basqarma basshysy Qaısar Sultanbaev málim etti.
«Jolda júrý zańnamasynyń jobasyn daıarlaý kezinde biz dúnıe júzinde bolyp jatqan jol qaýipsizdigin qamtamasyz etý máselelerin arnaıy zerttedik. Qazaqstan búginde jol qozǵalysynda qaýipsizdikti qamtamasyz etý aıasynda halyqaralyq konventsııany ratıfıkatsııalap otyr. Osyǵan baılanysty zertteýler boıynsha kólikpen júrý kezinde kúndiz de jáne túnde de shamdaryn jaǵyp júrgen elderde jol apattary 20 paıyzǵa deıin tómendegenin eskerdik. Sol sebepten biz osy normany qoldanysqa engizýdi jón kórdik», - dedi Q.Sultanbaev. Bul turǵyda ol atalmysh norma azamattardyń qaýipsizdigin qamtamasyz etýge septigin tıgizetindigin, JKO-lar sany azaıatyndyǵyn atap ótti. Shamdaryn jaqpaı júrgen júrgizýshilerge 5 aılyq eseptik kórsetkish kóleminde aıyppul salynady. Esterińizge sala keteıik, jańa jol júrý qaǵıdasynda sáıkes, joldaǵy (qalada, eldi mekenderde, jol ústinde) kólikterdiń barlyǵy kúndiz- túni shamdaryn jaǵyp júrýi tıis.
