Joldaǵy ólim-jitimdi 30 paıyzǵa tómendetin strategııa ázirlenip jatyr

ASTANA. KAZINFORM — Elimizde Jol qaýipsizdigi jónindegi alǵashqy ulttyq strategııany ázirleý jumysy bastaldy. Bul týraly Kólik mınıstrligi Avtomobıl joldary komıteti tóraǵasynyń orynbasary Anar Ǵabdýllına aıtty.

— Jol qaýipsizdigi jónindegi alǵashqy ulttyq strategııany ázirleý bastaldy. Bul qujat aldaǵy bes jylda jol-kólik oqıǵalarynan bolatyn ólim-jitim deńgeıin keminde 30 paıyzǵa tómendetýdi kózdeıdi. Budan bólek, ǵylymı mektepterdi damytý men bilikti mamandar daıarlaýǵa erekshe kóńil bólinip otyr. Biz ǵylymdy jol-kólik salasynyń ajyramas bóligi dep sanaımyz. Qazaqstan jaǵdaıynda joǵary tıimdilik pen turaqtylyqqa tek tereń zertteýler, óndiristik synaqtar jáne ınnovatsııalardy engizý arqyly qol jetkizýge bolady, — dedi Anar Ǵabdýllına Ortalyq kommýnıkatsııalar qyzmetindegi brıfıngte.

Onyń dereginshe, ótken jyly elimizde 12 myń shaqyrymǵa jýyq avtojolda jol jáne jol qurylysy jumystary júrgizildi. Bıyl bul kórsetkish 13 myń shaqyrymǵa deıin ulǵaıtylmaq. 

— Bul — aldyńǵy qatarly uıymdastyrý, tehnologııa jáne tásilderdi talap etetin aýqymdy jumys kólemi. Mundaı mindetterdi oryndaýda sheshýshi ról atqaratyn — ǵylym. Sebebi dál osy sala tıimdi, qaýipsiz jáne ekonomıkalyq turǵydan negizdelgen sheshimderdiń irgetasy bola alady, — dedi ol.

Aıta keteıik, Úkimette Premer-Mınıstrdiń orynbasary — Ulttyq ekonomıka mınıstri Serik Jumanǵarınniń tóraǵalyǵymen ótken ekonomıkalyq ósýdi qamtamasyz etý jónindegi shtab otyrysynda avtomobıl jáne temirjoldardy damytý jónindegi ınvestıtsııalyq jobalar qaraldy.