Joldaǵy myńdaǵan aqaý: 22 sarapshy jumystan shyǵarylyp, 53,4 mln teńge aıyppul salyndy
ASTANA. KAZINFORM — Jol jumystaryna tıisti baqylaý júrgizbegen 22 tehnıkalyq qadaǵalaý sarapshysy jumystan shyǵaryldy, dep habarlaıdy «QazAvtoJol» UK baspasóz qyzmeti.
Jyl basynan beri «QazAvtoJol» UK» AQ mamandary jol qurylysy men jóndeý jumystarynyń sapasyna 50-ge jýyq tekserý júrgizdi.
— Tekserý nátıjesinde 1 670 aqaý men talapqa sáıkessizdik anyqtaldy. Búginde onyń 831-i, ıaǵnı 49,8%-y joıyldy. Qalǵan kemshilikterdi joıý jumystary jalǵasyp jatyr. Anyqtalǵan aqaýlardyń qatarynda joldaǵy shuńqyrlar men oıyqtar, jaryqtar, asfaltbeton jamylǵysynyń yǵysýy, joltabandar jáne joldyń paıdalaný jaǵdaıyna áser etetin ózge de kemshilikter bar. Árbir anyqtalǵan derek boıynsha jaýapty tulǵalar belgilenip, tıisti sharalar qabyldanyp jatyr. Jumys sapasyn tıisinshe baqylamaǵan tehnıkalyq qadaǵalaý mamandaryna jalpy somasy 53,4 mln teńge kóleminde aıyppul sanktsııalary qoldanyldy. Sonymen qatar 22 tehnıkalyq qadaǵalaý sarapshysy jumystan shyǵaryldy, — delingen kompanııa taratqan aqparatta.
«QazAvtoJol» jol jumystarynyń sapasyna jáne tehnıkalyq qadaǵalaýǵa qoıylatyn talaptardy kúsheıtip jatyr. Aqaýdyń anyqtalýy — onyń qabyldanǵanyn bildirmeıdi. Merdiger uıymdarǵa kemshilikterdi joıý jóninde talap qoıylyp, jaýapty tulǵalarǵa tıisti sharalar qoldanylady.
Buǵan deıin Qazaqstan Halyq Keńesiniń birinshi sessııasynda Memleket basshysy Qasym-Jomart Toqaev jol sapasyn baǵalaý júıesin qaıta qaraý kerek ekenin aıtqan edi. Prezıdent keıde jańadan salynǵan keıbir nysandardyń sapasy syn kótermeıtinin, tipti, qoǵam talqysyna túsip jatatynyn atap ótti.
