Joldaǵy qaýipsizdik:árbir memlekettik organnyń mindetteri aıqyndalady
ASTANA. KAZINFORM — Oblysaralyq jáne aýdandaralyq joldardyń 10 myń shaqyrymy ortasha jóndeýmen qamtylady. Bul týraly Premer-mınıstr Oljas Bektenov málim etti.
- Jol-kólik oqıǵalarynyń aýyrlyq dárejesin tómendetýdiń eń tıimdi sharasy – qarama-qarsy baǵyttaǵy kólik legin bólý, bul joǵaryda kórsetilgen jobalardy iske asyrý sheńberinde joldardy I tehnıkalyq sanatqa aýystyrý arqyly qamtamasyz etiledi. Sonymen qatar respýblıkalyq joldardyń avarııalyq qaýipti ýchaskelerinde ınjenerlik sharalar iske asyrylyp jatyr, - dedi O. Bektenov Quryltaı depýtatynyń saýalyna jaýap bere otyryp.
Onyń aıtýynsha, Memleket basshysynyń tapsyrmasy boıynsha 2025-2028 jyldary avarııalyq-qaýipti ýchaskelerdi joıýǵa basymdyq bere otyryp, oblysaralyq jáne aýdandaralyq joldardyń 10 myń km ortasha jóndeýmen qamtylady.
- Qarjylandyrý tolyq kólemde Qazaqstannyń Damý Bankiniń qarajaty esebinen aıqyndalǵan. Aqyly ýchaskeler boıynsha júrip ótkeni úshin aqy alýdan túsetin qarajat respýblıkalyq joldardy kútip-ustaýǵa jáne jol tehnıkasy parkin jańartýǵa jumsalady. Bul rette jabynda aqaýlar anyqtalǵan jaǵdaıda, aqy alýdy ýaqytsha toqtata turý normasy engizildi. Budan basqa, avarııalyq-qaýipti ýchaskelerde jyldamdyq rejımin buzý derekterin avtomatty túrde tirkeıtin keshenderdi qoldaný keńeıtilýde jáne profılaktıkalyq jumys kúsheıtilip eatyr. Árbir memlekettik organnyń mindetterin aıqyndaıtyn Jol qaýipsizdigi strategııasy ázirlenýde, - dep túsindirdi Úkimet basshysy.
Aıta keteıik, buǵan deıin óńirlerde týrıstik áleýetti damytý aıasynda strategııalyq joldardyń biryńǵaı tizbesi jasalatynyn jazǵan edik.
