Joldaǵy júk kólikterin ólsheıtin avtomatty júıelerge kim órt qoıyp júr
ASTANA. KAZINFORM — Qazaqstanda aýyr júk kólikteriniń salmaǵyn baqylaıtyn avtomattandyrylǵan ólsheý júıeleriniń (AÓJ) órtenýine qatysty jyl basynan beri úsh jaǵdaı tirkeldi. Oqıǵalardyń sebepteri men mán-jaıyn quqyq qorǵaý organdary anyqtap jatyr.
«QazAvtoJol» málimetinshe, taǵy bir jaǵdaı 28 tamyzda «Astana — Qaraǵandy — Almaty» avtojolynyń 15-shaqyrymynda, Kúıgenjar eldi mekeni mańynda bolǵan. Saǵat 02:15 shamasynda AÓJ nysanynan órt shyqqan. Al júıe kólik quraldarynyń ótkeni týraly sońǵy derekti oqıǵadan birneshe mınýt buryn, 02:11–de tirkegen.
— Oqıǵa ornyna polıtsııa men krımınalıster shaqyryldy. Aldyn ala málimet boıynsha, apparattyq shkaftyń qurylymdyq erekshelikteriniń arqasynda onyń ishindegi jabdyqtar jaramdy kúıde saqtalǵan. Qazir órttiń shyǵý sebebi men oqıǵanyń barlyq mán-jaıy anyqtalyp jatyr, — delingen habarlamada.
«QazAvtoJol» mundaı jaǵdaılarǵa alańdaýshylyq bildirip jatyr. Eger AÓJ nysandary qasaqana zaqymdalǵany anyqtalsa, bul memlekettik baqylaý júıesine jáne avtomobıl joldarynyń saqtalýyn qamtamasyz etetin múlikke zııan keltirý retinde qarastyrylýy múmkin.
Avtomattandyrylǵan ólsheý júıeleri aýyr júk kólikteriniń jalpy salmaǵy men ostik júktemesin tirkeıdi. Onyń negizgi maqsaty — joldardy shamadan tys júktemeden qorǵaý.
Mamandardyń aıtýynsha, ruqsat etilgen salmaq normalarynyń turaqty túrde buzylýy joldardyń tez buzylýyna, oıyqtar men deformatsııalardyń paıda bolýyna jáne jóndeýaralyq merzimniń qysqarýyna ákeledi.
«QazAvtoJol» júk tasymaldaýshylardy belgilengen salmaq jáne ostik júkteme normalaryn qatań saqtaýǵa úndedi. Kompanııanyń ustanymy boıynsha, baqylaý júk kólikterine emes, artyq júkke qarsy júrgiziledi.
Eske salaıyq, buǵan deıin "QazAvtoJol" aýyr júk kóligi júrgizýshilerine mańyzdy eskertý jasaǵanyn habarlaǵanbyz.
