Joldaǵy avtokólikterdiń salmaǵyn ólsheıtin stantsııalarǵa beınekamera ornatylady

ASTANA. KAZINFORM — Elimizde jol boıyndaǵy avtomattandyrylǵan salmaq ólsheý stantsııalary beınekameramen jabdyqtalady.

Bul týraly Úkimet basshysy Oljas Bektenovtiń Májilis depýtattarynyń saýalyna bergen jaýabynda aıtylǵan.

— 2025 jylǵy 27 mamyrda Kólik mınıstrliginiń buıryǵymen (№ 168) avtomattandyrylǵan salmaq ólsheý stantsııalarynyń jumysyn uıymdastyrý qaǵıdalaryna stantsııalardy beınekameramen jabdyqtaýǵa qatysty ózgerister engizildi (vandalızm faktilerin azaıtý maqsatynda). Beınebaqylaýmen qamtý jumysyn «QazAvtoJol» ulttyq kompanııasy jáne jergilikti atqarýshy organdar júrgizedi, — delingen Úkimet basshysynyń jaýabynda.

Sondaı-aq, saýal jaýabynda atalǵan obektilerdi táýlik boıy kúzetpen qamtý edáýir qarjy talap etetini aıtylǵan. Atap aıtqanda, jumysshylardyń eńbekaqysy, tehnıkalyq jáne sanıtarlyq-gıgıenalyq talaptarǵa saı ǵımarat salý, taǵy basqa shyǵyndar kiredi. 

— Bul obektilerdi kúzetýdi Іshki ister mınıstrliginiń qaramaǵyna berý orynsyz dep sanaımyz, sebebi ishki ister organdarynyń negizgi mindeti — qoǵamdyq tártipti saqtaý jáne qylmyspen kúres, — dedi ol.

Odan bólek, Premer-mınıstrdiń jaýabynda avtojolda ornatylǵan avtomattandyrylǵan salmaq ólsheý stantsııasy Kólik mınıstrliginiń kólik derekteri bazasynyń aqparattyq-taldamalyq júıesimen biriktirilgen. Bul júıe jumysy týraly aqparatty naqty ýaqyt rejıminde alýǵa múmkindik beredi. 

Buǵan deıin elimizdegi avtojoldardyń sapasyn baqylaý úshin 220 avtojúıe ornatylatyny týraly habarlaǵan edik.