Joldaǵy ańyzdar: júrgizýshiler aıtatyn tylsym hıkaıalar
ASTANA. KAZINFORM – Elimizdiń ulan-ǵaıyr dalasyn kesip ótetin uzaq joldar tek asfalt pen shaqyrymdardan turmaıdy. Árbir tasjoldyń óz tarıhy, óz qupııasy bar. Biri ony jolaýshylardyń qııalynan týǵan áńgime dese, endi biri talaı joldy artqa tastaǵan júrgizýshilerdiń kórgen-bilgeni dep senedi, dep jazdy QazAvtoJol.
Túngi saparlarda aıtylatyn mundaı hıkaıalar jyldan-jylǵa, júrgizýshiden júrgizýshige tarap keledi. Keıbiri qorqynyshty estilgenimen, olardyń astarynda ómirlik sabaq jatyr.
Eshkiniń tuıaǵy bar qyz
Júrgizýshiler arasynda keń taraǵan kóne ańyzdardyń biri – túngi jolda kezdesetin jumbaq qyz týraly.
Aı sáýlesi tógilgen túnde ıen daladaǵy tasjolmen kele jatqan júrgizýshi jol shetinde turǵan jalǵyz qyzdy kóredi. Qyz qolyn kóterip, jaqyn aýylǵa jetkizip tastaýdy ótinedi. Jolaýshyǵa jany ashyǵan júrgizýshi kóligin toqtatyp, ony otyrǵyzady.
Qyz únsiz. Jol boıy til qatpaıdy. Biraq birazdan keıin kóliktiń ishi birtúrli salqyndaı bastaıdy. Pesh qyzyp tursa da, belgisiz bir muzdaı lep seziledi.
Bir sátte júrgizýshi artqy kórinis aınasyna kóz tastaıdy. Sol kezde júregi zý ete túsedi. Qyzdyń bir aıaǵy kádimgi adamdikindeı bolǵanymen, ekinshi aıaǵy eshkiniń tuıaǵyna uqsaıdy eken.
Kónekóz júrgizýshiler mundaı jaǵdaıda sabyr saqtaý kerek deıdi. Dalany qaq jaryp toqtaı qalmaı, jaryq jerge – janarmaı quıý beketine, polıtsııa beketine nemese aýylǵa jetken durys.
Al mejeli jerge jetip, artqa burylyp qarasańyz, qyz joq. Artqy oryndyq bos tur. Tek kólik tósenishinde qalǵan kómeski iz ǵana kózge shalynady.
Sodan beri bul oqıǵa jol ústindegi eń jumbaq ańyzdardyń birine aınalyp ketken.
Aq tústi belgisiz kólik
Astana men Qaraǵandy arasyndaǵy tasjolda júrgizýshiler jıi aıtatyn taǵy bir tylsym áńgime bar.
Qalyń boran soǵyp, kózge túrtse kórgisiz tuman túsken kezde aldyńyzdan nómirsiz aq kólik paıda bolady deıdi. Ol asyqpaı alda júredi. Beınebir jol kórsetip kele jatqandaı áser qaldyrady.
Onyń sońynan qaýipsiz araqashyqtyq saqtap júrgen júrgizýshiler jaqyn mańdaǵy beketke nemese eldi mekenge aman jetedi eken.
Biraq kólikten túsip, álgi júrgizýshige alǵys aıtpaq bolǵanda, aq kólik ǵaıyp bolady. Іzi de qalmaıdy.
Bireýler muny jaı ǵana sáıkestik dep qabyldaıdy. Al tájirıbeli shopyrlar:
– Joldyń da óz kıesi bolady. Keıde ol adasqan janǵa jol kórsetedi, – deıdi.
Sodan beri aq kólik týraly áńgime borandy túnderdiń ańyzyna aınalǵan.
Jol shetindegi qarııa
Qyzylorda men Jezqazǵan arasyndaǵy keń jazyqta aıtylatyn taǵy bir erekshe ańyz bar.
Tún ortasynda shapan kıgen aqsaqal jol jıeginde turyp, ózin jaqyn aýylǵa jetkizip tastaýdy suraıdy eken.
Júrgizýshi kóligin baıaýlatyp, apattyq belgini qosyp, artqy aınaǵa qarasa – qarııa joq.
Biraz júrgen soń alda qaýipti jer kezdesedi. Keıde bul ótkir burylys, keıde jolǵa shyǵyp ketken mal, al keıde jaryǵy janbaı turǵan buzylǵan kólik bolýy múmkin.
Sondyqtan kónekóz júrgizýshiler:
– Ondaı qarııany kórseń, mánisin izdeme. Tek jyldamdyqty azaıt, – deıdi.
Bul ańyzdyń astarynda da bir shyndyq jatyr: jol kútpegen jaǵdaılarǵa toly.
Mańǵystaýdyń jumbaq shyraqtary
Mańǵystaýdyń ıen dalasynda túnde belgisiz shyraqtar kórinedi degen áńgime erteden aıtylady.
Olar kókjıekte bir janyp, bir sónip, keıde jolmen qatar qozǵalyp kele jatqandaı kórinedi. Jaqyndaı bergen saıyn alystap, sońynan ergen adamdy adastyryp jiberedi deıdi.
Qart júrgizýshiler:
– Shyraqtyń sońynan erme. Dala seniń joldy qanshalyq biletinińdi synaıdy, – dep otyrady.
Sol sebepti bul óńirde túnde joldan sebepsiz shyqpaý – jazylmaǵan zań.
Ratsııadaǵy jumbaq daýys
Júk kóligin tizgindegenderdiń arasynda taǵy bir qyzyq ańyz bar.
Túnniń bir ýaǵynda ratsııadan beıtanys daýys estiledi eken.
– Jyldamdyqty azaıt...
Bir-aq ret aıtylady. Sosyn tynyshtyq ornaıdy.
Birneshe shaqyrym júrgen soń júrgizýshi álgi sózdiń mánin túsinedi. Alda jóndeý jumystary, jolǵa shyqqan janýar, ótkir burylys nemese apatty jaǵdaı kezdesedi.
Bul kimniń daýysy ekenin eshkim bilmeıdi.
Biraq tájirıbeli shopyrlar:
– Eger joldyń ózi baıaýlaýdy surasa, qarsy kelme, – dep kúledi.
