Jolda jaǵa jyrtysqandar ustaldy - Almaty polıtsııasy
ALMATY. QazAqparat - Almatyda jolǵa talasyp, bir-birine judyryq ala júgirgen júrgizýshiler ustaldy, dep habarlaıdy QazAqparat tilshisi.
Tártip buzýshylyq týraly vıdeo Instagram jelisinde jarııalandy. Raıymbek pen Nazarbaev dańǵyly qıylysynda «Nısan Maksıma» kóligi men «Mersedes» kóliginiń júrgizýshileri jolǵa talasyp qalǵan.
Júrgizýshiler jol ortasynda keptelis týdyryp, bir-birine judyryq ala júgirgen. Jolaýshylar olardyń tapansha jáne pyshaq alyp júgirgenin aıtqan. Alaıda, olardyń qolynda tapansha men pyshaq emes, aerozol ballony men ballon kilti bolǵan.
Posmotret etý pýblıkatsııý v Instagram
Qalalyq polıtsııa departamentiniń Jetisý aýdandyq ІІB qyzmetkerleri jolda tóbeles shyǵarǵan júrgizýshilerdi ustady.
Alaıda, bul derek týraly polıtsııaǵa eshkim habarlaspaǵan.
«Tóbeleske kóshedegi adamdar aralasyp, ajyratyp alǵan. 102 nómirine qońyraý túspedi. Bul jaıt týraly polıtsııa tek áleýmettik jeliden kórgen. Polıtsııa buzaqylardy kóp uzamaı ustap, suraq-jaýap aldy. «Nısan Maksıma» júrgizýshisi 27 jastaǵy Suramysov A ballon kiltin paıdalansa, 28 jastaǵy Sultanalı D «Premer-4» aerozoldi pıramehanıkalyq ballonymen qarýlanǵan. Atalǵan zattar iske dáıekzattary retinde tárkilendi. Bul derek boıynsha QR QK 293-babymen tergeý isi bastaldy», - dedi Jetisý aýdandyq polıtsııa basqarmasynyń basshysy Darhan Musanov.
