Jolda shlem kımegen elektr samokat júrgizýshilerine aıyppul salynady

ASTANA. QazAqparat – Elimizde shlem kımegen elektr samokat júrgizýshilerine aıyppul salynady. Bul týraly QR Іshki ister mınıstriniń orynbasary Igor Lepeha aıtty, dep habarlaıdy QazAqparat tilshisi.

«Jol boıynda samokat pen avtokólik soqtyǵysqan jaǵdaıda ǵana statıstıka júrgiziledi. Byltyr elimizde osyndaı 43 apat boldy, bir adam qaza tapty. Olardyń barlyǵy Almatyda tirkeldi. Bıyldyń ózinde osyndaı eki fakti bar. Biraq bul elektr samokattyń avtokólikpen nemese mototsıklmen soqtyǵysqan kezdegi statıstıkasy. Jaıaý júrginshiler jolaǵynda apattar áldeqaıda kóp. Alaıda bul oqıǵalar boıynsha statıstıka júrgizilmegen. Endi kóliktiń osy túrine qatysty naqty talaptardy zańdastyrsaq, Bas prokýratýra mundaı statıstıkany qamtıdy», - dedi Igor Lepeha Májiliste tilshiler suraǵyna jaýap bere otyryp.

Onyń aıtýynsha, elimizde elektr samokattardyń jyldamdyǵy saǵatyna 25 kılometrden aspaýy tıis.

«Samokatpen jolǵa shyqqan kezde, onyń júrgizýshide mindetti túrde tıisti shlem men jaryq shaǵylystyratyn (túnde) kıimi bolýy kerek. Bul talaptardy elemegenderge aıyppul salynady», - dedi mınıstrdiń orynbasary.

Budan buryn habarlanǵandaı, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine jol júrisin uıymdastyrý máseleleri boıynsha ózgerister men tolyqtyrýlar engizý týraly» Zańy qabyldandy. Qujat aıasynda elektr samokattarmen jolda júrý tártibi retteledi.

Elektr samokatta júkter men jolaýshylardy tasymaldaýǵa tyıym salynady.