Jolda qalyp qoıǵan alys saparly avtobýstyń jolaýshylary qutqaryldy
ASTANA. 23 qańtar. QazAqparat /Rýslan Ǵabbasov/ - Keshe «Qazaqavtojol» RMK men Tótenshe jaǵdaılar departamentiniń qyzmetkerleri jolda turyp qalǵan avtobýstyń 35 jolaýshysyn qutqardy.
«Qazaqavtojol» RMK baspasóz qyzmetiniń málimetinshe, atalǵan vedomstvolardyń qyzmetkerleri «Shý-Blagoveşenka» kúre jolynyń 19-ynshy shaqyrymynda janar jaǵar maıy qatyp qalý saldarynan jolda qalyp qoıǵan «Almaty-Taraz» baǵytyndaǵy avtobýsty anyqtap, ondaǵy jolaýshylardy jaqyn jerdegi Belbasar aýylynyń mektebine jetkizdi. Vedomstvolar qyzmetkerleri keıinnen jolaýshylardy avtobýspen Tarazǵa jetkizip salýǵa kómektesti.
