Jolda qalǵan Tájikstannyń - 43, Reseıdiń 4 azamaty qutqaryldy
NUR-SULTAN. QazAqparat - Pavlodar oblysynda eki jolaýshylar avtobýsy buzylyp, Reseı men Tájikstan azamattary dalada qaldy. Bul týraly QR ІІM Tótenshe jaǵdaılar komıtetinen málim etti, dep habarlaıdy QazAqparat tilshisi.
«20 qarasha kúni saǵat 05.30-da »Pavlodar-Qyzylorda« avtomobıl jolynyń 200 shaqyrymynda, Ekibastuz qalasy mańyndaǵy Bozshakól aýylynan 6 shaqyrym jerde »Novokýznetsk-Shymkent« baǵytynda qatynaıtyn »Setra« markaly jolaýshylar avtobýsy buzylyp qaldy. Salonda 45 adam boldy, onyń 43-i - Tájikstan azamattary. Tótenshe jaǵdaılar departamentiniń, TJK-niń «Shiderti» jol boıyndaǵy medıtsınalyq-qutqarý pýnktiniń, jergilikti polıtsııa qyzmeti men jergilikti atqarý organynyń qyzmetkerleri jolaýshylardy Bozshakól aýylynyń orta mektebindegi jylyný pýnktine jetkizdi. Jolaýshylar medıtsınalyq kómekti qajet etpeıdi», - dep atap ótedi vedomstvodan.
Sonymen qatar komıtet málimetinshe, búgin tańǵy saǵat 04.20-da Pavlodar oblysynyń Aqsý qalasyna taqaý jerde, «Pavlodar-Qyzylorda» avtomobıl jolynyń 35 shaqyrymynda «Qaraǵandy-Omby» baǵytynda qatynaıtyn «Neoplan» markaly jolaýshylar avtobýsy da buzylǵan.
«Avtobýs salonynda 12 adam bolǵan, onyń ishinde tórteýi - Reseı azamattary. TJD men jergilikti atqarý organynyń kúshimen 11 jolaýshy Lenınskıı eldi mekenindegi «Sytyı Spýtnık» dámhanasyna jetkizildi. Medıtsınalyq kómekti qajet etken joq», - dedi komıtetten.
