Jolda qalǵan 100-ge jýyq adam Şýchedegi jylý ortalyqtaryna ornalastyryldy
ASTANA. KAZINFORM — Aýa raıynyń qolaısyzdyǵyna baılanysty jolda qalǵan 95 azamat Şýche qalasyndaǵy jylý ortalyqtaryna ornalastyryldy. Olardyń ishinde 39 bala bar, dep habarlaıdy Kazinform.kz tilshisi.
Býrabaı aýdanynyń ákimdigi Instagram paraqshasynda habarlaǵandaı, Aqmola oblysynda aýa raıynyń buzylýyna baılanysty «Astana-Petropavl» respýblıkalyq mańyzy bar avtojol ýchaskelerinde Astana qalasynan Şýchınsk qalasyna deıin 18-232 shaqyrym aralyǵynda kólik quraldarynyń barlyq túrleri úshin qozǵalys jabyldy.
«Azamattyq qorǵaý qyzmetkerlerimen birge aýa raıynyń qolaısyzdyǵyna baılanysty mejeli jerinen tys qalǵan 95 azamat, onyń ishinde 39 bala Şýche qalasyndaǵy jylý ortalyqtaryna ornalastyryldy», - dep habarlady ákimdik.
Zerendiden Astanaǵa jol tartyp, jylý pýnkti – Ekologııa kolledjine kóshirilgen týrısterdiń biri qutqarýshylarǵa, polıtsııa qyzmetkerlerine jáne aýdan ákimdigine alǵysyn bildirdi.
Bul rette ákimdik qyzmetkerleri de oblys turǵyndary men qonaqtaryn avtokólikpen uzaq saparǵa shyqpaýǵa, sınoptıkterdiń boljamyn tyńdap, qutqarý qyzmetiniń habarlamalaryn nazardan tys qaldyrmaýǵa shaqyrdy.
Buǵan deıin «Astana-Şýche» tas jolynda jappaı kólik apaty bolǵany habarlanǵan edi. Qutqarýshylar 63 eresekti jáne 8 balany evakýatsııalady.