«Jolda qabyldaý»: El aýmaǵynda 280 jedel top azamattarǵa keńes berip, máselelerin sheshýde
Іshki ister mınıstri, polıtsııa general-leıtenanty Erlan Turǵymbaevtyń tapsyrmasy boıynsha turǵyndarmen keri baılanys ornatý úshin búgin elimizdiń barlyq óńirinde «Jolda qabyldaý» jedel aktsııasy óz jumysyn bastady. Bul aktsııa kóptegen óńirlerde oblystyq polıtsııa departamentteri birinshi basshylarynyń tikeleı qatysýymen bastaldy.
Aıtalyq, Qaraǵandy oblysy polıtsııa departamentiniń bastyǵy Erlan Faızýllın Qaraǵandy qalasynyń turǵyny Janat Aryqbaevtyń jeke sektorlar ornalasqan Ermekov kóshesine jyldamdyqty shekteý týraly jol belgisin qoıýǵa qatysty birinshi suraǵyna jaýap berip, bul máseleni qysqa ýaqyttyń ishinde sheshý jóninde tapsyrma berdi. Aktsııa aıasynda oblystyń aýdan ortalyqtarynda, qalalarda 19 jedel top jumys isteýde.
Al Almaty oblysynyń turǵyndary polıtsııa basshysy Murat Urymhanovqa kóshi-qon, lıtsenzııalyq-ruqsat berý júıesi jáne jol qaýipsizdigi salasyna qatysty suraqtar qoıdy. Oblysta 24 jedel top belsendi jumys atqaryp otyr.
Respýblıka aýmaǵynda azamattardy qabyldaıtyn barlyǵy 282 jedel pýnkt iske qosylǵan. Osy pýnktilerde turǵyndar ınstantsııaǵa barmaı-aq, ózderin qyzyqtyrǵan suraqtardy qoıyp, qajetti túsiniktemeler aldy. Sondaı-aq óz máselelerin sheship jatyr.
Aıta keteıik, mınıstrdiń tapsyrmasy boıynsha óńirlik ishki ister organdary osyndaı aktsııany aı saıyn ótkizip turatyn bolady.
Atalǵan is-sharanyń ótkiziletin orny jáne «jedel jeliniń» telefon nómirlerin ІІM-niń resmı portalynan, sondaı-aq +7 (7172) 437613 telefonyna habarlasyp bilýge bolady.