«Jolda qabyldaý»: Bir saǵatta júzdegen saýal tústi
PETROPAVL. QazAqparat - Soltústik Qazaqstan oblysynda «Jolda qabyldaý» aktsııasy óz jumysyn jol boıynda ornalasqan 17 pýnktte júrgizdi. Birneshe saǵattyń ishinde turǵyndardan 100-den astam saýal kelip tústi, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, qoıylǵan suraqtardyń basym bóligi kólikti qaıta jabdyqtaý men kóshi-qon zańnamasy, azamattyq qarýdy tirkeý men saqtaý, ákimshilik aıyppuldardy tóleý jáne memlekettik qyzmetterdi kórsetýmen baılanysty boldy. Ásirese, avtokólik ıelerin aıyppuldardy tóleýdegi jeńildikter júıesi qyzyqtyrdy.
Polıtseıler túsindirip ótkendeı, eger quqyq buzýshy aıyppuldy 1 aptanyń ishinde tólemese, 30 paıyzdyq jeńildik arqyly tóleı alady. Bul jeńildik alǵash ret baıqamaı ereje buzǵan azamattarǵa, kámeletke tolmaǵandarǵa, júkti áıelderge, sondaı-aq 14 jasqa deıingi balalary bar azamattarǵa qatysty. Sonymen birge, aıyppuldy azaıtýǵa múmkindik beretin basqa da sebepter bar.
«Jolda qabyldaý» respýblıkalyq aktsııasy aıasynda baspasóz týry ótkizildi. Onyń barysynda tártip saqshylary memlekettik qyzmet kórsetý jumystarynyń nátıjelerimen tanystyrdy.
Ekskýrsııa protsessıngtik ortalyqtan bastaldy. Bul jerge avtomatty rejımde qala joldarynda tirkelgen quqyq buzýshylyqtar týraly barlyq aqparattar kelip túsedi jáne óńdeledi. Jyl basynan Petropavl qalasynyń «ıntellektýaldy kóshe qıylystarynda» 1700-den astam buzýshylyq tirkelgen. Osy jerde buzýshylyq faktileri týraly habarlama-hattar jınaqtalyp, kólik quraldary ıeleriniń mekenjaılaryna joldanady, eskertýler SMS-habarlamalaryn jiberý jáne avtomatty qońyraý shalý arqyly da iske asyrylady.
BAQ ókilderi Mamandandyrylǵan halyqqa qyzmet kórsetý ortalyǵynda da boldy. Munda SQO PD Tirkeý-emtıhan alý bóliminiń qyzmetkerleri memlekettik qyzmet túrlerin kórsetti. Bólim bastyǵynyń aıtýynsha, jyl basynan olar turǵyndarǵa 20 myńnan astam memlekettik qyzmet kórsetken. 6077 kólik quraly tirkelip, 5018-i esepten shyǵarylǵan. Memlekettik tirkeý nómirlik belgileriniń 4906 jıyntyǵy, 5780 júrgizýshi kýáligi berilgen.
Baspasóz-týry «Ońtústik» baqylaý-ótkizý beketinde aıaqtaldy. Jýrnalısterge hattamalardy elektrondy túrde toltyrýdyń, jyljymaly termınaldardyń múmkindikteri tanystyryldy.
«Jolda qabyldaý» aktsııasy eki kún boıy ótedi. Tártip saqshylarynyń aıtýynsha, azamattardy qabyldaý oryndarynan áleýmettik jeliler arqyly tikeleı efır júrgiziledi. Turǵyndardyń suraqtardy onlaın rejımde qoıý múmkindikteri bar. Sonymen qatar, eki kún boıy 777-642-32-97 (WhatsApp) nómiri arqyly «tikeleı jeli» jumys isteıdi.
