Jolda demalý úshin kez kelgen jerge toqtaýǵa bola ma: júrgizýshiler neni bilýi kerek
ASTANA. KAZINFORM — Jolda sharshaǵanda nemese telefon qońyraýyna jaýap berý qajet bolǵanda kólikti jol jıegine toqtatý yńǵaıly kórinýi múmkin. Alaıda Qazaqstanda avtomagıstralderde arnaıy belgilengen oryndardan tys jerde toqtaýǵa tyıym salynady. Bul talapty buzý júrgizýshi men jolaýshylardyń ómirine qaýip tóndirýi múmkin.
Qazaqstannyń Jol júrisi qaǵıdalaryna sáıkes, avtomagıstralderde «Turaq orny» nemese «Demalys orny» belgilerimen belgilengen alańdardan basqa jerlerde toqtaýǵa bolmaıdy. Bul talap «Avtomobılderge arnalǵan jol» belgisi ornatylǵan joldarǵa da qatysty. Bul týraly «QazAvtoJol» ulttyq kompanııasynyń baspasóz qyzmeti habarlady.
Nelikten jol jıeginde toqtaý qaýipti?
Avtomagıstralderde kólikter joǵary jyldamdyqpen qozǵalady. Ásirese qarańǵyda, jańbyr nemese qar jaýǵan kezde jol jıeginde turǵan avtomobıldi der kezinde baıqaý qıyn. Kólik aǵynyna qaraǵan jaqtan túsý nemese júris bóligine jaqyn turý da qaýipti jaǵdaıǵa ákelýi múmkin.
Sondyqtan uzaq saparǵa shyqqanda demalys ýaqytyn aldyn ala josparlap, arnaıy turaqtar men demalys alańdaryn tańdaǵan jón.
Jolda amalsyz toqtaýǵa týra kelse, ne isteý kerek?
Júrgizýshilerge myna qaýipsizdik talaptaryn saqtaý usynylady:
-
Avarııalyq jaryq sıgnalyn qosyńyz. Múmkindik bolsa, kólikti júris bóliginen barynsha qaýipsiz jerge shyǵaryńyz.
-
Avarııalyq toqtaý belgisin qoıyńyz. Eldi mekennen tys jerde belgi kólikten keminde 30 metr qashyqtyqta ornalasýy kerek. Ol basqa júrgizýshilerge anyq kórinýi tıis.
-
Jaryq shaǵylystyratyn keýdeshe kıińiz. Kólikten shyǵarda abaı bolyp, múmkindik bolsa, qozǵalys aǵynyna qarama-qarsy jaqtaǵy esikti paıdalanyńyz. Sodan keıin joldan qaýipsiz qashyqtyqqa, qorshaýdyń arǵy jaǵyna ótińiz.
-
Qozǵalys jolaqtaryn kesip ótpeńiz. Qaýipsizdik úshin joldyń júris bóliginde júrmeńiz.
-
Qajet bolsa, kómekke habarlasyńyz. Shuǵyl jaǵdaıda 112 nómirine qońyraý shalýǵa bolady. Respýblıkalyq mańyzy bar avtomobıl joldaryndaǵy jaǵdaı týraly 1403 baılanys ortalyǵynan aqparat alýǵa bolady.
Eske salaıyq, buǵan deıin Premer-mınıstr Oljas Bektenov kameralardy kólik júrgizý kezinde telefonǵa telmirgen júrgizýshilerdi anyqtaýǵa baǵyttaýdy tapsyrǵan edi.
