Jolbarystar tirshilik etetin «Іle-Balqash» tabıǵı rezervaty qurylady
ASTANA. QazAqparat - 2018 jyly jolbarystar tirshilik etetin «Іle-Balqash» tabıǵı rezervaty qurylady. Bul týraly búgin Qazaqstanda jolbarystardy reıtrodýktsııalaý baǵdarlamasyn júzege asyrý boıynsha yntymaqtastyq týraly memorandýmǵa qol qoıý rásiminde QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov málim etti, dep habarlaıdy QazAqparat.
«2012 jyly Búkilálemdik jabaıy tabıǵat qory bastaǵan naqty jumystar Qazaqstannyń ǵylymı mamandaryn tarta otyryp, elimizde jolbarystardy reıtrodýktsııalaý jónindegi baǵdarlama jobasyn ázirleýge túrtki boldy. Bizdiń usynystarymyzdy eskere otyryp, jolbarystardy reıntrodýktsııalaý baǵdarlamasyn júzege asyrý boıynsha yntymaqtastyqty jalǵastyrýǵa ashyq ekendigimizdi qýattaı túskim keledi. 2014 jyldyń mamyrynda Almatyda qazaqstandyq jáne halyqaralyq sarapshylardyń qatysýymen semınar ótkizilip, onda jobarystardyń reıtrodýktsııasy úshin Іle saǵasynyń aýmaǵy jaramdy ekendigi naqtylandy», - dep atap ótti mınıstr.
Onyń aıtýynsha, baǵdarlama eskertpelerdi qaperge alyp, qaıta tolyqtaı jasalǵannan keıin 2015 jyldyń mamyr aıynda tanystyrylǵan.
«WWF-Reseıdiń Qazaqstannyń tabıǵatyna jolbarystardy reıntrodýktsııalaý boıynsha bastamasyn qoldaı otyryp, bul jumystardyń ýaqyt boıynsha barynsha uzaqqa sozylatyndyǵyn jáne birinshi kezekte jolbarystardyń boljamdy reıntrodýktsııalaný orynynyń qorǵalatyn tabıǵı aýmaǵyn qurý talap etiletindigin atap ótken jón. Osyǵan balıanysty 2017 jyldyń tamyzynda Aýyl sharýashylyǵy mınıstrliginiń 2018 jyldyń 1 qańtarynan «Іle-Balqash» memlekettik tabıǵı rezervatyn qurý týraly usynysyn respýblıkalyq bıýdjettik komıssııa qoldady. Qazaqstandaǵy jolbarystardyń reıntrodýktsııasy boıynsha sharalardy odan ary júzege asyrý maqsatynda Aýyl sharýashylyǵy mınıstrligi men Reseıdiń Búkilálemdik jabaıy tabıǵat qory arasynda yntymaqtastyq týraly memorandým ázirlendi», - dedi Asqar Myrzahmetov.
