Jolbarystardyń ózdiginen kóbeıýi úshin olardyń sany 50-ge jetýi kerek
ASTANA. KAZINFORM — Qazaqstanda jolbarystardyń adamnyń aralasýynsyz ózdiginen kóbeıip, turaqty popýlıatsııa qalyptastyrýy úshin olardyń sany shamamen 50-ge jetýi qajet. Bul týraly Ekologııa jáne tabıǵı resýrstar mınıstri Álibek Qýantyrov aıtty.
Mınıstrdiń aıtýynsha, jolbarystardy Qazaqstan tabıǵatyna qaıta jersindirý baǵdarlamasy birneshe kezeńnen turady. Alǵashqy kezeńde jyrtqyshtardy jabaıy tabıǵatqa jiberý kózdelse, kelesi maqsat — olardyń tabıǵı jolmen kóbeıýine jaǵdaı jasaý.
— Bizdiń josparymyz boıynsha 2033 jylǵa deıin jabaıy tabıǵatqa shamamen 10 nemese odan da kóp jolbarys jiberiledi. Biraq bul kórsetkish baǵdarlamanyń nátıjesine qaraı ózgerýi múmkin. Al jolbarystardyń adamnyń aralasýynsyz tabıǵı ortada ózdiginen kóbeıýi úshin olardyń sany shamamen 50-ge jetýi kerek. Biz osyǵan umtylamyz, — dedi Álibek Qýantyrov.
Onyń sózinshe, aldaǵy ýaqytta Qazaqstan Reseıdegi seriktesterimen birlesken jumysty jalǵastyrýdy josparlap otyr. Sonymen qatar elimizde burynnan arnaıy qorshaýda ustalyp otyrǵan jolbarystar da bar.
— Bizde zoobaqtardan buryn ákelingen janýarlar bar. Olar jabaıy tabıǵatqa jiberilmeıdi. Bul jolbarystar bizge osynda jańa urpaq alý úshin qajet. Keıin olardyń tóli tabıǵı ortaǵa jiberýge daıyndalady, — dedi mınıstr.
Mınıstr 2033 jylǵa deıingi jospardyń baǵdarlamanyń júzege asý barysyna qaraı qaıta qaralýy múmkin ekenin atap ótti.
Aıta keteıik, buǵan deıin «Іle-Balqash» memlekettik tabıǵı rezervatyna jiberilgen eki jolbarystyń araqashyqtyǵy qazir 20-25 shaqyrymdy quraıtyny habarlandy.
