Jolbarystar mekendeıtin rezervattyń aýmaǵy 450 myń gektarǵa deıin ulǵaıtyldy
ASTANA. KAZINFORM — Qazaqstanda jolbarystardy tabıǵı ortaǵa beıimdeý úshin «Іle-Balqash» memlekettik tabıǵı rezervatynyń aýmaǵy 450 myń gektarǵa deıin keńeıtildi. Bul týraly Ekologııa jáne tabıǵı resýrstar mınıstri Álibek Qýantyrov málimdedi.
Mınıstrdiń aıtýynsha, qazaqstandyq, reseılik jáne halyqaralyq sarapshylar jolbarystardy qaıta jersindirýdiń ǵylymı tujyrymdamasyn ázirlep, olardyń tirshilik etýine qolaıly aýmaq retinde Іle ózeniniń mańaıy men Balqash kóliniń ońtústik jaǵalaýyn tańdaǵan.
— Genetıkalyq zertteýler Turan jáne Amýr jolbarystarynyń bir-birine óte jaqyn ekenin kórsetti. Sondyqtan Qazaqstandaǵy jolbarystar popýlıatsııasyn qalpyna keltirý úshin Amýr jolbarysy tańdaldy. Jolbarys tabıǵaty saqtalǵan jerde ǵana tirshilik ete alady. Osy maqsatta «Іle-Balqash» rezervaty qurylyp, bıyl qańtarda Úkimet qaýlysymen onyń aýmaǵy 450 myń gektarǵa deıin ulǵaıtyldy, — dedi Álibek Qýantyrov.
Rezervat quramyna Uzynaral túbegi, Balqash kóliniń araldary men halyqaralyq mańyzy bar sýly-batpaqty alqaptar engizilgen.
Mınıstrdiń sózinshe, sońǵy jyldary bul aýmaqta jolbarystardyń tabıǵı mekenin qalpyna keltirý jáne qajetti ınfraqurylymdy damytý jumystary júrgizilip jatyr. Jyrtqyshtardyń óz betinshe tirshilik etýi úshin qorektik qordy kóbeıtýge erekshe kóńil bólingen.
— Osy ýaqytqa deıin rezervatqa 200-den astam Buqar buǵysy men 140 qulan qonystandyryldy. Sondaı-aq jolbarystardyń qorektik qoryn arttyrýǵa baǵyttalǵan jumystar turaqty júrgizilip keledi, — dedi mınıstr.
Aıta keteıik, buǵan deıin Іle-Balqashta ekinshi jolbarys tabıǵatqa jiberilgeni habarlandy. Rezervatqa jiberilgen eki jolbarystyń araqashyqtyǵy qazir 20-25 shaqyrymdy quraıtyny, ári olardyń qashan kezdesýi múmkin ekeni týraldy jazdyq.
