Jolbarystar eldi mekenderge jaqyndaǵan jaǵdaıda qandaı shara qabyldanady
ASTANA. KAZINFORM — Qazaqstanda tabıǵatqa jiberilgen jolbarystar eldi mekenderge jaqyndaǵan jaǵdaıda turǵyndarǵa aldyn ala eskertý berilip, arnaıy mamandar iske kirisedi. Bul týraly Ekologııa jáne tabıǵı resýrstar mınıstri Álibek Qýantyrov aıtty.
Mınıstrdiń sózinshe, jolbarystardy Qazaqstan tabıǵatyna qaıta jersindirý baǵdarlamasy ázirlengen kezde jaqyn mańdaǵy aýyl turǵyndarynyń qaýipsizdigine erekshe nazar aýdarylǵan. Osy maqsatta arnaıy top qurylyp, jyrtqyshtardyń qozǵalysyn táýlik boıy baqylaý uıymdastyrylǵan.
— Halyqtyń qaýipsizdigi — biz úshin basty másele. Sondyqtan baǵdarlamany daıyndaǵan kezde barlyq faktordy, onyń ishinde jaqyn mańdaǵy turǵyndardyń qaýipsizdigin eskerdik. Arnaıy top quryldy. Onyń mamandary rezervatta táýlik boıy jumys istep jatyr, — dedi Álibek Qýantyrov.
Onyń aıtýynsha, jolbarystardyń qozǵalysyn baqylaý úshin aýmaq shartty túrde birneshe aımaqqa bólingen. Eger jyrtqysh belgilengen jasyl aımaqtan shyǵyp, sary aımaqqa ótse, arnaıy topqa jáne jaqyn mańdaǵy aýylǵa belgi beriledi.
— Eger jolbarys sary aımaqqa kirse, tıisti sıgnal arnaıy topqa jáne aýylǵa túsedi. Mamandar qajetti tehnıkalyq quraldardy paıdalanyp, jolbarysty keri qaıtarýǵa daıyn, — dep túsindirdi mınıstr.
Tabıǵatqa jiberilgen jolbarystarǵa arnaıy baqylaý qarǵybaýlary taǵylǵan. Bul qurylǵylar olardyń qaıda júrgenin qadaǵalaýǵa múmkindik beredi.
Mınıstrdiń aıtýynsha, jolbarystardyń sany kóbeıgen saıyn olardy baqylaý tásilderi de ózgerýi múmkin. Degenmen qajet bolǵan jaǵdaıda kez kelgen jolbarysty ustap, oǵan baqylaý qurylǵysyn qaıta taǵýǵa bolady.
Aıta keteıik, buǵan deıin Іle-Balqashta ekinshi jolbarys tabıǵatqa jiberilgeni habarlandy.
