Jolaýshylarǵa qyzmet kórsetý boıynsha jańa talaptar kúshine endi - QR KKM
ASTANA. 20 qańtar. QazAqparat - Memlekettik qyzmetterdi kórsetý standarttarynyń jańa talaptaryn avtovokzaldar men avtobeketterdiń, avtobýstyq tasymaldaýshylardyń, taksılerdiń,
sonymen qatar temirjol vokzaldarynda jáne poıyzdarda jolaýshylarǵa qyzmet kórsetý sapasyn arttyrý maqsatymen Kólik jáne kommýnıkatsııa mınıstrligi ázirlegen.
Atap aıtqanda, avtovokzaldar men avtostansalar qyzmetteri boıynsha memlekettik standart qyzmet kórsetýshi qyzmetkerlerge, jolaýshylardyń aqparattyq qamsyzdandyrylýyna, sanıtarlyq jáne tehnıkalyq parametrlerine, irgeles aýmaqtarǵa, bagajdardyń saqtyǵyna, beınebaqylaý men ınternetke shyǵý júıelerimen jabdyqtalýyna, sapar aldyndaǵy tehnıkalyq jáne medıtsınalyq baqylaýǵa, qyzmetterdiń múgedekter úshin qoljetimdi bolýyna, bıletterdiń satylýyna jáne taǵy sondaı qoıylatyn talaptar eskerilip otyr.
Turaqty jáne turaqsyz avtobýstyq tasymaldaý qyzmetterin kórsetý standartyna sáıkes qalaaralyq, oblysaralyq jáne halyqaralyq qatynastaǵy jolaýshylar men bagajdyń avtomobıldik tasymaldaýynda qoldanylatyn turaqty avtobýstar men shaǵyn avtobýstardyń naqty ýaqyt rejimindegi qozǵalys baǵdaryn baqylaıtyn júıemen jabdyqtalýy tıis.
Kún saıyn aýysym aıaqtalǵannan keıin avtobýs qorabynyń syrty jýylyp, tazartý jáne zalalsyzdandyrýshy saımandardy paıdalaný arqyly salon dymqyl tazartýdan ótýi tıis. Al avtobýs oryndyqtary bútin bolýy tıis. Sondaı-aq jeldetkish pen jylytý júıeleriniń, sonymen birge ishki jaryqtandyrý men avtobýs salonyndaǵy akýstıkanyń ólshemderi rettelgen.
Jolaýshylardy taksı-avtomobılderimen tasymaldaýǵa qoıylatyn talaptarǵa sáıkes tasymaldaýshy avtokólik quraldarynyń sapar aldyndaǵy tehnıkalyq baqylaýyn jáne taksı júrgizýshileriniń sapar aldyndaǵy (aýysym aldyndaǵy) medıtsınalyq baıqaýyn, sonymen qatar dıspetcherlik qyzmettiń bolýyn nemese dıspetcherlik qyzmet kórsetý şartynyń bolýyn jáne taksı buzylǵan kezde ony der ýaqytynda basqasyna aýystyrylýyn qamtamasyz etý qajet.
Taksı avtomobılderinde ózdigimen jumys jasaýǵa ruqsatnama júrgizýshilerge tasymaldaýshy bekitken tártip boıynsha synaqtan ótkennen keıin beriledi. Aqaýlyǵy bar nemese tehnıkalyq baıqaýdan ótpegen (jarty jylda bir ret) avtokólik quralyn paıdalaný jáne avtokólik quralyn júrgizý kezinde, qulaqqapty nemese qatty daýys baılanysyn qoldanýdan basqa, telefondy paıdalanýǵa tyıym salynady.
Búgingi kúni Qazaqstan Respýblıkasynda avtomobıl kóligine barlyq kólik túrindegi tasymaldyń jalpy sanynyń 95 % jolaýshylar tasymalyna keledi. Sondyqtan belgilengen standarttardyń talaptaryn ustaný avtomobıl kóligimen jolaýshylardy tasymaldaǵan kezde halyqqa órkenıetti, sapaly jáne qaýipsiz qyzmetterdi usynýdy qamtamasyz etýge múmkindik beredi.
Temirjol vokzaldarynda qyzmet kórsetý standartyn alsaq, ol qyzmetter spektrin keńeıtý men olardy kórsetý sapasyn arttyrýǵa, vokzaldar sharýashylyǵynyń ınfraqurylymyn jańǵyrtýǵa biregeı talaptardy belgileıdi. Odan basqa jańa standart jolaýshylardyń jáne vokzal qyzmetkerleriniń keshendi qaýipsizdigin qamtamasyz etýdi qarastyrǵan.
Fırmalyq poıyzdarda jolaýshylardy yńǵaıly tasymaldaý úshin múmkindikteri shekteýli jolaýshylardy tasymaldaýǵa arnalǵan vagondardyń bolýy, kirý esigi arnaıy múgedek arbasyn kótergishpen jabdyqtalýy sııaqty talaptar standartpen belgilengen.
Belgilengen standarttar aǵymdaǵy jyldyń 1 qańtarynan iske qosylyp, Qazaqstan Respýblıkasyndaǵy jolaýshylardy tasymaldaý qyzmetin kórsetetin barlyq menshik túrine táýelsiz kompanııalarǵa taralady, dep habarlady Kólik jáne kommýnıkatsııa mınıstrliginiń baspasóz qyzmetinen.
