Jolaýshylardy elorda shekarasynan alyp ótpek bolǵan taksıst ustaldy
NUR-SULTAN. QazAqparat – Elordada karantın jarııalanǵan ýaqyttan beri qala shekarasynan zańsyz ótý faktileri kóbeıdi, dep habarlaıdy QazAqparat qalalyq prokýratýraǵa silteme jasap.
Aıtalyq, 22 naýryz kúni Elýbaev atty azamat karantın rejımi kezinde jolaýshylarǵa qala shekarasynan zańsyz ótkizý qyzmetin usynǵan. Sóıtip polıtsııa qyzmetkerlerine ustalyp qaldy.
«Tótenshe jaǵdaı rejımin buzǵany úshin Elýbaev 15 táýlikke qamaldy» dep málim etti prokýratýra.
Aıta keteıik, buǵan deıin elordanyń taǵy tórt turǵyny qala shekarasynan jaıaý shyǵyp bara jatqanda ustalyp, qamalǵan edi. Sondaı-aq karantın rejımin buzǵan taǵy 7 turǵynnyń isi sotta qaralyp jatyr.
