Jolaýshylardy bıletsiz tasymaldaǵan poıyz basshysyna aıyppul salyndy
ASTANA. QazAqparat - QR Indýstrııa jáne damý mınıstrligi Kólik komıtetiniń mamandary sáýir aıynda ótken jolaýshylar poıyzdaryn tekserý qorytyndylaryn jarııalady, dep habarlaıdy QazAqparat tilshisi.
Atap aıtqanda, № 43/44 «Qostanaı-Almaty-Qostanaı» jáne № 307/308 «Astana-Jezqazǵan-Astana» quramdary tekserilgen bolatyn.
«Qostanaı-Almaty-Qostanaı» baǵyty boıynsha júretin poıyzda 23 bıletsiz jolaýshy tasymaldanǵany anyqtaldy. Nátıjesinde 4 vagon jolserigine qatysty ákimshilik is qozǵaldy. Budan bólek, jolaýshylardy, bagajdy jáne júk-bagajyn tasymaldaý erejeleri buzylǵan. Sonymen birge, jolaýshylar vagonynyń poıyz elektromehanıkasy men jabdyqtaryndaǵy órt dabyl quraldarynda aqaýlar bary anyqtaldy», - dep atap ótilgen komıtet málimetinde.
Budan bólek, «Astana-Jezqazǵan-Astana» jolaýshylar poıyzyn tekserý kezinde 29 bıletsiz jolaýshy anyqtalǵan. Osyǵan baılanysty poıyz basshysyna aıyppul salyndy. Budan bólek, poıyz elektromehanıkasynyń órt dabyly quraldarynyń aqaýlary belgili boldy.
«Jolaýshylar tasymaly» AQ-nyń atap ótýinshe, «Qostanaı-Almaty-Qostanaı» poıyzy jeke tasymaldaýshy «Túrksib Astana» JShSǵa, al «Astana-Jezqazǵan» quramy «Maral Nur» JShS-ǵa qarasty.
«Tekserýler nátıjesinde ınspektorlar poıyzdyń jumysshylary men tasymaldaýshylaryna qatysty 12 ákimshilik is qozǵap, jalpy somasy 228 475 teńge aıyppul saldy», - delingen habarlamada.
Esterińizge sala keteıik, 2017 jyly kólikti baqylaý ınspektsııalary jolaýshylar poıyzdaryna 875 tekserý júrgizip, 1194 bıletsiz jolaýshy, 1,9 tonna rásimdelmegen bagaj anyqtaldy. Nátıjesinde 472 ákimshilik is qozǵalyp, 4,6 mln teńge aıyppul salyndy.
