Jolaýshylar valıdatorsyz avtobýstarda jolaqy tóleýi tıis - Astana LRT
ASTANA. QazAqparat - Jolaýshynyń qolynda Astra plat kartasy bola tura, ol valıdatorsyz avtobýstarda jolaqyny qolma-qol aqshamen tóleýge tıisti me? Bul saýalǵa «Astana LRT» túsinikteme berdi, dep habarlaıdy QazAqparat.
«Astana LRT» qoǵammen baılanys jónindegi departament dırektory Asqar Atagýlınniń sózine qaraǵanda, kez kelgen jaǵdaıda jolaýshylar qoǵamdyq kólikte jolaqy tóleýi tıis.
«Keıbir avtobýstarda valıdatorlardyń joqtyǵy - Astra plat kartasyn satyp alyp, oǵan aqsha salǵan jolaýshylardyń sharýasy emestigin túsinemin. Alaıda basqa jaǵynan alyp qarasaq, ıaǵnı Jolaýshylar men júk tasymaldaý erejesine sáıkes, jolaýshylar túgel bıletpen qamtamasyz etilip, barlyq jolaqy tólenýi tıis», - dedi ol.
Departament basshysy sonymen qatar kodekste kondýktor jolaýshyǵa bılet berýge, al jolaýshy jolaqysyn tóleýge mindetti ekeni jazylǵanyn jetkizdi.
Onyń aıtýynsha, jyl sońyna deıin elektrondy tólem múmkindigi qarastyrylmaǵan barlyq eski avtobýstar jańasyna aýystyrylady.
«Eger eski avtobýstarǵa valıdatorlar satyp alyp, olarǵa lıtsenzııa rásimdesek, bul óz kezeginde qarjyny jelge ushyrǵanmen birdeı. Sebebi eski avtobýstar jańa júıede júktelgen qyzmetterdi atqara almaıdy», - dedi ol.
