Jolaýshylar tasymalyn sýbsıdııalaý mehanızmine biryńǵaı standart engizilmek
NUR-SULTAN. QazAqparat – Senatta temirjol kóligi máseleleri jónindegi zań jobasy qaraldy, dep habarlaıdy QazAqparat tilshisi.
«Zań jobasy negizgi úsh máseleni sheshýdi kózdeıdi. Birinshi – jolaýshylar tasymalyn sýbsıdııalaýdy ońtaılandyrý jáne ashyqtyq berý, ekinshisi – júkterdiń jasyryn tranzıtin aldyn alý, úshinshisi - tutynýshylardyń quqyqtaryn qorǵaýdy esepke ala otyryp, kirme joldar qyzmetterin retteý», - dedi Indýstrııa jáne ınfraqurylymdyq damý mınıstri Beıbit Atamqulov.
Mınıstrdiń aıtýynsha, qazirgi tańda jolaýshylar tasymaly memleket bıýdjetinen sýbsıdııalanady. Bul baǵytta jylyna bıýdjetten 30 mlrd teńge bólinedi.
«Shyǵystyń basqa bir bóligin «Qazaqstan temir joly» júk tasymaly kiristeri esebinen jabylady. Bul ishki «kross sýbsıdııalaý» dep atalady. Atalǵan shemada aqsha aǵyndaryn taratýdyń bir ortaǵa baǵyttalýy jáne ashyqtyǵy joq. Júıeniń ashyqtyǵyn qamtamasyz etý úshin kelesi túzetýler usynylady. Birinshiden, jolaýshylar qozǵalysynda lokomotıvtik tartymnyń jeke operatoryn qurý josparlanady. Ekinshiden, bıýdjetten qosymsha qarajatty qarastyrmaı, kross sýbsıdııalaýdan bas tartý úshin jolaýshylar tasymaldaýshylaryn qoldaýǵa júk tasymaldaýshynyń teńgerimdeýshi tólemi engiziledi. Bul jolaýshylar tasymalynyń naqty shyǵyndaryn kórýge múmkindik beredi», - dedi ol.
Beıbit Atamqulov bul rette atalmysh norma jańa mehanızmdi naqty pysyqtaý úshin tek bir jylǵa ǵana iske asyrylatynyn atap ótti.
«Ózgeristerdiń nátıjesinde memlekettik sýbsıdııalardy taratýdyń aıqyndylyǵy artady. Osylaısha, jolaýshylar tasymalyn sýbsıdııalaý mehanızmin biryńǵaı standartqa alyp kelemiz», - dedi ol.
