«Jolaýshylar tasymaly» kompanııasy fotobaıqaý júldegerin izdeýde
ASTANA. QazAqparat - «Jolaýshynyń úzdik sýreti» taqyrybyna jarııalanǵan fotobaıqaý óz máresine jetti. Bul jaıynda «Jolaýshylar tasymaly» AQ baspasóz qyzmeti málim etti.
Kompanııa aqparatyna qaraǵanda, baıqaýǵa 100-den astam sýret kelip túsip, eń úzdik dep tanylǵan avtorlarǵa tıisti júldeleri tabystaldy. Atap aıtqanda, baıqaýdyń bas júldesi iPhone 7 plus uıaly telefony «Anashym, biz qaı stansada turmyz?» dep atalatyn sýretti jibergen astanalyq Serik Aqbaevqa berildi.
«Biz úshin kútpegen jaǵdaı. Fotobaıqaý týraly jolaýshylap bara jatyp áleýmettik jeli arqyly bildik. Jubaıymnyń keńesi boıynsha osy sýretti túsirip jiberdik. Tosynsyıǵa rahmet»,- dedi Aqbaev.
Al Azamat Ǵalıýllanyń «Jaılaýdaǵy kóktem» jumysy 2 oryn aldy. Oǵan iPhone 7 berildi. Úshinshi oryn jáne iPad mini gadjeti Daryn esimdi jolaýshyǵa buıyrdy.
«Ol ókinishke oraı óziniń tolyq aty-jónin kórsetpepti. Daryn 8- (7172) 600-236 telefony boıynsha habarlasyp, óz júldesin ala alady», - dedi kompanııa baspasóz qyzmetinen.
Aıta keteıik, baıqaýdyń sharty boıynsha kez kelgen jolaýshy sapar barysynda qyzyqty da mazmundy sýretter túsirip jiberý kerek bolatyn.
