«Jolaýshylar tasymaly» el vokzaldarynda bıletterdi satyp alýmen dúrbeleń týyndap jatqandyǵy týraly aqparatty teriske shyǵardy
ASTANA. 27 maýsym. QazAqparat /Gúlmıra Álıakparova/ - «Jolaýshylar tasymaly» AQ keıbir BAQ-tarda jarııalanǵan Qazaqstannyń vokzaldarynda temir jol bıletterin satyp alý kezinde dúrbeleń týyp jatqandyǵy týraly aqparatty joqqa shyǵardy.
«Keıbir buqaralyq aqparat kózderinde Qazaqstannyń vokzaldarynda, ásirese Almaty-2 vokzalynda temir jol bıletterin satyp alý kezinde dúrligýdiń bolýy týraly aqparattar asyra aıtylyp júr. Osyǵan oraı «Jolaýshylar tasymaly» AQ BAQ-daǵy aqparat shyndyqqa janaspaıtyndyǵyn habarlaıdy», - delingen kompanııanyń baspasóz qyzmeti taratqan habarlamada.
Anyqtalǵandaı, Almaty-2 temir jol vokzalynda bıletterdi satyp alýmen «qarbalas» joq. BAQ-tarda habarlanǵandaı, kassalardyń aldynda uzyn sonar kezekter de joq. «Jolaýshylar tasymaly» AQ klıentterge barynsha jaılylyq jaǵdaıyn týǵyzý maqsatynda qoldanysqa elektrondy kezekti engizdi. Bul - kezekti avtomatty túrde rettep, jolaýshylarǵa kezekterin oryndyqtarda otyryp kútýge múmkindik beredi. Elektrondy kezek qaǵıdaty boıynsha jolaýshylarǵa bir mezgilde birneshe kassada qyzmet kórsetedi. Bir jolaýshyǵa kassada qyzmet kórsetý ýaqyty orta esepppen 2-4 mınýtty quraıdy. Onymen birge, kassa zalynda júretin vokzal kezekshisi jolaýshynyń kez kelgen suraǵyna jaýap berip, kómek kórsetedi.
Budan ózge, «Jolaýshylar tasymaly» AQ quzyrly organ qyzmetkerlerimen, qoǵamdyq uıym ókilderimen jáne «Nur Otan» partııasymen birlese otyryp zań buzýshylyqtarǵa qarsy jáne vokzaldar men jolaýshylar poıyzyndaǵy tártipti qatańdatý boıynsha túrli is-sharalar júrgizýde. Kompanııa ókilderi búgingi tańda, alypsatarlardyń vokzal ǵımaratynyń ishinde júzege asyratyn áreketterine tolyǵymen tosqaýyl qoıylǵandyǵyn qadap aıtýda. Sonymen birge, «Jolaýshylar tasymaly» AQ-nyń kúshimen jáne quqyq qorǵaý organdarynyń kómegimen bıletti vokzal ǵımaratynan tys jerde zańsyz ıelený faktileri áldeqaıda azaıdy.
«Al jekelegen poıyzdardaǵy oryn jetispeýshiligi jaz mezgilindegi demalysqa, oqýshylar men stýdentterdiń jazǵy demalysy kezindegi jolaýshylar aǵymynyń kóbeıýine baılanysty. Mysalǵa, aǵymdaǵy jyldyń aqpan aıynda Almaty-2 stansasynda táýligine 3000 bılet satylsa, maýsym aıynda 4300 bılet satyldy. Keı adamdarda jolaýshylar tasymaly týraly jaǵymsyz pikir qalyptasqan. Jyldar boıy qalyptasqan kózqarastardy eskere otyryp, «Jolaýshylar tasymaly» AQ sońǵy eki jylda halyqtyń jolaýshylar tasymalyna degen suranysyn tolyq qanaǵatandyrý maqsatynda túbegeıli sharalardy qoldanýda, jyljymaly quramdy nátıjeli paıdalanyp, qyzmet kórsetý sapasyn jaqsartý ústinde. Barlyq múmkindikter qarastyrylyp, jolaýshylar poıyzyna qosymsha vagondar tirkelýde», - deıdi baspasóz qyzmeti.
Osy rette, «Jolaýshylar tasymaly» kompanııasy jolaýshylarǵa óz saparlaryn aldyn-ala josparlaýǵa keńes berýde. Sebebi, bıletter satylymǵa 45 kún buryn túsedi. Sonymen qatar, ýaqytty únemdep, kassa aldyndaǵy kezekte turmas úshin, bıletterdi ınternet arqyly nemese óz-ózine qyzmet kórsetetin tranzaktsııalyq termınaldar arqyly satyp alýdy usynady. Al jýyq arada, jolaýshylar temir jol bıletterin Qazaqstannyń barlyq aımaǵynda ornatylatyn satylym termınaldary arqyly satyp ala alatyn bolady.
