«Jolaýshylar tasymaly» basshylary Tulpar-Talgo» poıyzdarynyń basshylarynan syıaqy alyp otyrǵan

NUR-SULTAN. QazAqparat – QR Qarjylyq monıtorıng agenttiginiń elordalyq departamenti «Ekspress» fılıalynyń «Jolaýshylar tasymaly» aktsıonerlik qoǵamynyń Nur-Sultan qalasy boıynsha ýchaskesiniń bastyǵy men onyń orynbasarynyń «Tulpar-Talgo» poıyzdarynyń basshylarynan júıeli túrde aqshalaı syıaqy alý faktilerin anyqtady.

Bul týraly QazAqparat QR Qarjylyq monıtorıng agenttiginiń baspasóz qyzmetine silteme jasap habarlaıdy.

«Ekspress» fılıalynyń «Jolaýshylar tasymaly» aktsıonerlik qoǵamynyń elordalyq ýchaskesiniń basshysy men onyń orynbasary tekserý júrgizbegeni úshin ár reısten zańsyz aqsha talap etip, alyp otyrǵan. Barlyǵy 27 epızod anyqtaldy.

Kináliler kommertsııalyq uıymdarda basshylyq qyzmet atqarý quqyǵynan aıyra otyryp, 6 mıllıon teńgege jýyq aıyppul tóleýi tıis.

«Qazirgi ýaqytta atalǵan uıymǵa qylmystyq quqyq buzýshylyq jasaýǵa yqpal etken mán-jaılardy joıý týraly usynys engizildi»,-delingen habarlamada.