«Jolaýshylar tasymaly» AQ jumysynyń tıimsizdigi synǵa alyndy
ASTANA. QazAqparat - Elimizdegi qaýipti vagondardyń jumysy toqtatyldy. Bul týraly QR Kólik jáne kommýnıkatsııa vıtse-mınıstri Mereke Pshembaevtyń tóraǵalyǵymen «Jolaýshylar tasymaly» AQ, «Qala mańyndaǵy tasymal» AQ jáne «VagonServıs» AQ qatysýymen ótken keńeste málim boldy.
Keńeste kólikti baqylaý organdarynyń tekserisi barysynda anyqtalǵan kompanııa tarapynan jiberilgen buzýshylyqtar týraly aıtyldy.
Onyń ishinde eskertýler jolaýshylarǵa kórsetiletin qyzmetterdiń sapasyna, vagondardaǵy temperatýralyq rejımniń saqtalmaýyna, jolserikterdiń kásiptik talaptarǵa sáıkessizdigine jáne temirjol kóliginiń tehnıkalyq paıdalaný qaǵıdasyn buzýǵa qatysty boldy.
«Sonymen birge, «Jolaýshylar tasymaly» AQ ınspektorlyq quramy jumysynyń tıimsizdigi de tilge tıek etildi. Bul jaıynda jolaýshylardy bıletsiz jappaı tasýdyń kóptegen oqıǵalary bolǵandyǵy dálel. Bıyl kompanııanyń jolaýshylar poıyzdarynda osyndaı 107 oqıǵa anyqtalǵan. Munymen qosa, 2013 jyly 19 sapasyz jóndeý men jolaýshylar vagondaryna tehnıkalyq qyzmet kórsetý (qubyr aqaýlary, vagondarda dóńgelek jubynyń buzylýy) bolǵany jóninde aıtyldy», delingen mınıstrliktiń taratqan málimetinde.
Budan tys, jyl basynan órt qaýipi týraly belgi berý qurylǵylarynyń saldarynan «Jolaýshylar tasymaly» AQ №351/352 «Almaty-Zaşıta» jáne 375/376 «Astana-Lenınogorsk» jolaýshylar poıyzdarynyń quramyndaǵy 35 jolaýshylar vagonynyń paıdalanylýy toqtatyldy.
Kezdesý qorytyndylary boıynsha «Jolaýshylar tasymaly» AQ-na ınspektorlyq apparattyń tıimdilik júıesin engizý, saparǵa jolaýshylar vagondary quramyn reıske ázirleýge baqylaýdy kúsheıtý, sonymen qatar bıletsiz jolaýshylardy tasymaldaýdy boldyrmaý jáne buzýshylyq jasaǵan laýazymdy tulǵalarǵa qatysty sharalardy qoldaný usynyldy.
