«Jolaýshylar tasymaly» AQ temirjolmen júk tasymaldaý qyzmetine jeńildikter engizedi
ASTANA. 31 tamyz. QazAqparat /Gúlmıra Alıakparova/ - «Jolaýshylar tasymaly» AQ 2011 jyldyń 1 qyrkúıeginen bastap temirjolmen júk tasymaldaý qyzmetine 30-dan 70 paıyzǵa deıin jeńildikter engizedi.
Bul týraly kompanııanyń baspasóz qyzmetinen habarlady.
Máselen, 15 tonna júk bagajyn Qazaqstan aýmaǵynda 1000 shaqyrymǵa deıingi qashyqtyqqa tasymaldaý quny jeńildiksiz - 807 227 teńgeni quraǵan bolsa, jeńildikpen - 398 232 teńgeni quraıtyn bolady.
Ikemdi tarıftik saıasat júk tasymalynyń tıimdiligin arttyrý jáne oǵan qyzyǵýshylyq tanytý maqsatynda iske asyrylyp otyr.
Júk tasymaly júkterdi temirjol kóligi arqyly tasymaldaýdyń eń tıimdi tásili bolyp tabylady. Negizgi artyqshylyqtar - kórsetiletin qyzmet túriniń baǵasy men sapasyndaǵy araqatynastyń tıimdiligi, jyldam jetkizý, qaýipsizdik, qyzmet kórsetý aýqymynyń keńdigi.
«Jolaýshylar tasymaly» AQ-nyń ınfraqurylymy damyǵan jáne baǵyttar júıesi naqtylanǵan. Júk tasymaly jolaýshylar poıyzdary arqyly júzege asyrylady. Vagondardyń júk kóterimdiligi - 20 tonna. Qazirgi ýaqytta «Jolaýshylar tasymaly» AQ-nyń 32 júk vagony 15 baǵyt boıynsha qatynaıdy.
