«Jolaýshylar tasymaly» AQ tarıfterdiń qymbattaýyna qatysty pikir bildirdi
NUR-SULTAN. QazAqparat – 2019 jyldyń 1 qańtarynan bastap áleýmettik mańyzy bar baǵyttarǵa tarıfter qymbattamaǵan. Bul týraly «Jolaýshylar tasymaly» AQ baspasóz qyzmeti málimdedi, dep habarlaıdy QazAqparat.
Birqatar BAQ-ta 2019 jyly áleýmettik mańyzy bar tarıfterdiń kóterilgeni týraly aqparatqa baılanysty «Jolaýshylar tasymaly» AQ habar taratady.
«Tarıfterdiń ósýi/kemýi týraly sheshimdi ýákiletti organ kórsetilgen esepterge baılanysty qabyldaıdy. Osyǵan oraı, 2019 jyldyń 1 qańtarynan bastap tarıfter qymbattamaǵan», - dedi baspasóz qyzmeti.
Sondaı-aq, Qazaqstan Respýblıkasy Indýstrııa jáne ınfraqurylymdyq damý mınıstrligi Kólik komıteti men «Jolaýshylar tasymaly» AQ arasynda jasalǵan jolaýshylardy tasymaldaýǵa baılanysty tasymaldaýshynyń shyǵyndaryn uzaqmerzimdi sýbsıdııalaý týraly kelisimge sáıkes, áleýmettik mańyzy bar baǵyttarǵa jolaýshylardy tasymaldaý qyzmetine tarıfterdiń jyl saıyn ósetini qarastyrylǵanyn atap ótti.
«Sonymen birge, Qazaqstan Respýblıkasy Indýstrııa jáne ınfraqurylymdyq damý mınıstrligi Kólik komıtetiniń 2019 jylǵy 9 qyrkúıektegi № 28-28-9/2920 hatyna sáıkes, «Jolaýshylar tasymaly» AQ-ny qurý úshin 2019 jylǵy 21 qyrkúıekten bastap áleýmettik mańyzy bar 28 baǵyt boıynsha tarıfterdi 10%-ǵa ósirý kelisildi. Jalpy, «Jolaýshylar tasymaly» AQ-nyń 39 baǵyty memlekettik jáne jergilikti bıýdjetten sýbsıdııalaýǵa jatady», - delingen habarlamada.
